Ініцыятыва зыходзіла ад кіраўніцтва Нацыянальнага парка. Даследаваннямі займаліся супрацоўнікі Інстытута гісторыі Нацыянальнай акадэміі навук Беларусі і нацыянальнага парка «Прыпяцкі». Яны правялі абследаванне шэрагу помнікаў археалогіі (Бобінка 2, Камянюкі 2 і Камянюкі 16) на тэрыторыі Белавежскай пушчы метадам радыётэхнічнага павярхоўнага зандзіравання. 

«Метад дазваляе праверыць наяўнасць анамалій пад зямлёй і скласці карту помніка. Для абследавання выбіраліся помнікі розных эпох — каменнага веку і ранняга Сярэднявечча, размешчаныя ў розных тапаграфічных умовах», — растлумачылі ў навуковым аддзеле нацпарка «Белавежская пушча». Там удакладнілі, што вынікі даследаванняў стануць асновай для далейшай сумеснай работы па вывучэнні аб’ектаў гісторыка-культурнай спадчыны Белавежскай пушчы. 

Дарэчы, на тэрыторыі пушчы размешчаны археалагічны музей пад адкрытым небам. Ён прадстаўлены трыма экспазіцыямі, якія адлюстроўваюць гісторыю беларускіх зямель у перыяд ад каменнага веку да ранняга Сярэднявечча.