У сярэдзіне цяперашняй дэкады ў сувязі з памяншэннем дажджоў умовы для нарыхтоўкі кармоў і правядзення агратэхнічных мерапрыемстваў па догляду за пасевамі палепшацца. Пры гэтым на пераўвільгатненых глебах правядзенне палявых работ па-ранейшаму будзе цяжка.

«Па выніках інструментальнага вызначэння вільготнасці глебы, запасы прадуктыўнай вільгаці ў большасці раёнаў Беларусі добрыя. Аднак праз моцныя дажджы, пераважна ў паўночнай палове рэспублікі, вільгацезапасы павышаныя», — паведамілі ў Белгідрамеце.

Здавальняючыя запасы прадуктыўнай вільгаці назіраліся толькі ў асобных раёнах у паўднёвай частцы краіны. На поўдні Гродзенскай вобласці, дзе ў адрозненне ад большай часткі тэрыторыі Беларусі ў першай дэкадзе чэрвеня ападкаў было мала, захоўваюцца нізкія вільгацезапасы.