Раніцай 7 студзеня аператар падключыў да сеткі яшчэ каля 2 тыс. хатніх гаспадарак і прыкладна 100 прадпрыемстваў. Як чакаецца, поўнасцю энергазабеспячэнне ўдасца аднавіць пасля абеду 8 студзеня. 

3 студзеня каля 50 тыс. хатніх гаспадарак і 2 тыс. прадпрыемстваў у Берліне засталіся без электрычнасці з-за ўзгарання падвеснага кабельнага моста. Паліцыя адразу не выключыла версію падпалу, якая пазней пацвердзілася. Адказнасць за дыверсію ўзяла на сябе леварадыкальная анархісцкая групоўка «Вулкан», якая пад рознымі назвамі дзейнічае ў Берліне і Брандэнбургу на працягу 14 гадоў. Левыя радыкалы ў лісце, накіраваным у паліцыю, заявілі аб імкненні «абясточыць уладу заможных» і адкрыта заклікалі да новых дыверсій на энергетычных аб’ектах, а таксама сцвярджалі, што падпал быў накіраваны супраць «імперскага ладу жыцця».

Улады Берліна раней аб’явілі рэжым надзвычайнай сітуацыі, а расследаванне дыверсіі ўзяла на сябе Генпракуратура ФРГ у Карлсруэ, якая займаецца расследаваннем асабліва цяжкіх злачынстваў, што ўяўляюць сабой пагрозу дзяржбяспецы.