Выпадак адбыўся ў Ляхавічах. Зайшоўшы ў гараж у двары дома, малы 2023 года нараджэння выявіў бутэльку ад газаванага напою з вадкасцю. Падумаўшы, што гэта салодкая вада, дзіця зрабіла глыток. «Напоем» аказалася вадкасць для мыцця рухавіка, якую напярэдадні бацька дзіцяці прынёс у гараж. З прыкметамі атручэння хімічным рэчывам малалетні шпіталізаваны ва ўстанову аховы здароўя.

Цікаўнасць прывяла ў бальніцу дзяўчынку 2022 года нараджэння. Дзіця разам з бацькамі пражывае ў Івацэвічах. Малая, знаходзячыся дома, дастала з шафы на кухні блістар з таблеткамі і ўжыла іх. Калі бацькі гэта заўважылі, неадкладна даставілі дзіця ў бальніцу, дзе яму правялі прамыванне страўніка. Жыццю дзяўчынкі нічога не пагражае.

Эксперты-хімікі адзначаюць, што выпадковыя атручэнні вадкасцямі сярод дзяцей сустракаюцца нярэдка. Як правіла, гаворка ідзе пра ачышчальныя, мыйныя сродкі, пералітыя ў бутэлькі з-пад газаваных напояў. Прэпараты бытавой хіміі ўтрымліваюць у сваім складзе небяспечныя рэчывы — шчолачы і кіслоты, якія пры прыёме ўнутр выклікаюць цяжкае атручэнне, а часам прыводзяць да смерці.