У Брэсцкай вобласці па праграме «Адзін раён — адзін праект» рэалізавалі 20 праектаў у 18 гарадах і раёнах. Дзякуючы гэтаму створана 912 новых працоўных месцаў. 

У прыватнасці, у Баранавічах мадэрнізавалі вытворчасць вадкіх мыйных сродкаў у ААТ «Бархім». На тэрыторыі ЗАТ «Брэсцкі навукова-тэхналагічны парк» арганізавалі вытворчасць складаных 3D-ліццёвых формаў і робататэхнічных комплексаў. У ААТ «Бярозабудматэрыялы» пашырылі вытворчасць керамічнай пліткі. У Ганцавіцкім раёне арганізавана біяфармацэўтычная вытворчасць лекаў на аснове плазмы крыві. У Пінскім раёне ў ААТ «Парахонскае» ўведзены ў эксплуатацыю комплекс па вытворчасці травяных гранул. У рэгіёне завяршылі работу і па многіх іншых праектах.

«У 2026 годзе працягнецца рэалізацыя яшчэ сямі праектаў з больш познімі тэрмінамі завяршэння», — адзначылі ў Брэсцкім аблвыканкаме. Там звярнулі ўвагу на асаблівую значнасць ініцыятывы для невялікіх раёнаў, якія атрымліваюць дадатковыя пункты росту.

«Дзякуючы магчымасці карыстацца дзяржаўнай падтрымкай у выглядзе льготных крэдытных рэсурсаў прадпрыемствы малога і сярэдняга бізнесу матываваныя да рэалізацыі менавіта вытворчых праектаў. Пры гэтым нярэдка ў рэгіёнах з’яўляюцца абсалютна новыя напрамкі дзейнасці. Такі падыход не толькі ўмацоўвае эканоміку раёнаў, але і ў разы павышае яе патэнцыял развіцця», — падсумавалі ў Брэсцкім аблвыканкаме.