Крыху менш за месяц застаецца да старту ўнікальнага культурна-адукацыйнага праекта «Цягнік Памяці». Сёлета ён адзначыць свой пяцігадовы юбілей. З гэтай нагоды на маршруце цягніка, які штогод збірае сотні старшакласнікаў з Беларусі, Расіі і краін СНД, з’явяцца новыя прыпынкі і аб’екты. Акрамя таго, падчас двухтыднёвага падарожжа па гарадах, звязаных з гісторыяй Вялікай Айчыннай вайны, школьнікі пазнаёмяцца з культурай і традыцыямі суседніх дзяржаў. Чым яшчэ будзе адметны юбілейны «Цягнік Памяці» — у размове са старшынёй Пастаяннай камісіі Савета Рэспублікі па адукацыі, навуцы, культуры і сацыяльным развіцці Наталляй ПАЎЛЮЧЭНКА.

Сенатар запэўніла, што сёлета маршрут «Цягніка Памяці» стане яшчэ больш маштабны. Яна нагадала, што праект быў ініцыяваны ў снежні 2021 года Старшынёй Савета Рэспублікі Наталляй Качанавай і Старшынёй Савета Федэрацыі Валянцінай Матвіенка, а летам 2022-га паспяхова рэалізаваны. Ініцыятыва была падтрымана прэзідэнтамі Беларусі і Расіі Аляксандрам Лукашэнкам і Уладзімірам Пуціным.

Пастаўленыя задачы дасягнуты

— Безумоўна, першапачаткова мэта праекта заключалася ва ўмацаванні і пашырэнні сяброўскіх, добрасуседскіх адносін паміж маладымі людзьмі з нашых краін. Акрамя таго, ён накіраваны на патрыятычнае выхаванне, захаванне гістарычнай памяці аб Вялікай Айчыннай вайне, — падкрэсліла Наталля Паўлючэнка, дадаўшы, што ў арганізатараў праекта атрымалася дасягнуць пастаўленых задач. — Вядома, і гарады, і кірункі праекта развіваюцца. І калі мы гаворым пра 2026 год, то самая асноўная задача ў нашых рэгіёнаў, аблвыканкамаў, Мінскага гарвыканкама і Міністэрства адукацыі — сфарміраваць насычаную праграму.

Сёлета запланавана наведванне ўдзельнікамі праекта 13 гарадоў — 8 на тэрыторыі Беларусі, яшчэ 5 — у Расіі.

— Наш падыход — максімальна прадставіць кожны рэгіён, — адзначыла парламентарый. — Акрамя знакавых гістарычных і культурных аб’ектаў мы заклалі ў праграму наведванне прамысловых прадпрыемстваў, каб маладыя людзі маглі азнаёміцца з нашымі вытворчымі магчымасцямі. І калі мы гаворым пра моладзь — куды ж без разнастайнай забаўляльнай праграмы?! Усё будзе, і старшакласнікі гэтага вельмі чакаюць. Таму рыхтуемся і вельмі чакаем старту.

«Я патрыёт сваёй краіны»

З году ў год праект «Цягнік Памяці» набірае ўсё большую папулярнасць, і жадаючых адправіцца ў займальнае падарожжа па старонках сумеснай гісторыі сапраўды шмат. У сувязі з гэтым Наталля Паўлючэнка расказала і пра строгі адбор удзельнікаў. Імі становяцца фіналісты рэспубліканскага конкурсу «Я патрыёт сваёй краіны», які складаецца з чатырох адборачных этапаў: школьнага, раённага, абласнога і рэспубліканскага.

— Для таго каб прайсці гэтыя этапы, дзецям трэба скласці партфоліа, візітную картку і падрыхтаваць эсэ на ваенную тэму. Сёлета было пададзена 12 тысяч заявак! З іх былі адабраны 50 фіналістаў. Гэта тыя маладыя людзі, якія складалі самыя яркія работы і, безумоўна, паказалі сябе як актыўныя ўдзельнікі ў грамадскім жыцці.

Педагогі, якія будуць суправаджаць падчас падарожжа старшакласнікаў, таксама праходзілі пэўныя этапы адбору. Акрамя рэспубліканскага конкурсу пад назвай «Перамогу шануем, герояў памятаем», для педагагічнага складу былі прад’яўленыя пэўныя патрабаванні: вышэйшая педагагічная адукацыя, вопыт працы больш за тры гады.

Сенатар расказала і аб тым, як развівалася геаграфія краін-удзельніц «Цягніка Памяці». Так, на самым старце праекта ў ім удзельнічалі ўсяго дзве краіны — Беларусь і Расія. Паступова геаграфія пашыралася, і летась упершыню прадстаўнікі маладога пакалення з усіх 15 краін былога СССР удзельнічалі ў праекце.

— Гэта выдатны вопыт, які будзе захаваны і сёлета. Трэба прытрымлівацца той канцэпцыі, якая добра сябе паказала. І, вядома, вельмі важны старт гэтай праграмы, які адбудзецца ў сумную дату — 85-годдзе пачатку Вялікай Айчыннай вайны, — рэзюмавала Наталля Паўлючэнка.

У гонар пяцігоддзя праекта ў яго лагатыпе з’явіцца сімвалічная пяцёрка, а для ўдзельнікаў сшыюць новую экіпіроўку. 

Традыцыйным вырашана зрабіць і новаўвядзенне мінулага года — работу ўнутранай пошты паміж школьнікамі.

Не толькі па святах

Пад стук колаў «Цягніка Памяці» па добрай традыцыі зараджаецца моцнае сяброўства, у аснове якога — агульная гісторыя, павага і шанаванне подзвігу ветэранаў, адзіныя каштоўнасці міру. Школьнікі нават пасля ўдзелу ў праекце працягваюць камунікаваць, нягледзячы на тое, што між імі — тысячы кіламетраў. Сярод тых, хто ўжо знайшоў новых сяброў падчас займальнага падарожжа, — удзельніца праекта «Цягнік Памяці — 2025» Карына МУРАШКА. Яна не толькі падзялілася сваімі ўражаннямі, але і расказала, чаму важна захоўваць гістарычную памяць:

— Безумоўна, «Цягнік Памяці» — унікальны праект. Удзел у ім назаўжды пакінуў у мяне незабыўныя эмоцыі і ўражанні. Усе мае сябры сачылі за маім двухтыднёвым падарожжам у сацсетках з белай зайздрасцю, з нецярпеннем чакалі новыя відэаролікі. Пры наведванні месцаў воінскай славы ўзнікае пачуццё гонару за тых, хто здабыў Вялікую Перамогу. І памятаць пра гэта мы павінны заўсёды.

Данііл ХМЯЛЬНІЦКІ

Фота БелТА