«Цяперашняя зіма ў Беларусі выдалася досыць снежнай у параўнанні з апошнімі гадамі. Гэты сезон адзначыўся рэкорднымі снегападамі і моцнымі маразамі. Варта адзначыць, што рэзкія адлігі (калі снег становіцца мокрым і цяжкім) у разы павялічваюць нагрузку на дахі будынкаў. Назапашванне снегу на дахах — скрытая пагроза, якая можа прывесці да сур’ёзных наступстваў за лічаныя секунды», — падкрэслілі ў ведамстве.

З пачатку 2026 года адбылося 27 выпадкаў абвальвання будаўнічых канструкцый будынкаў і збудаванняў, у тым ліку ад уздзеяння снегавой нагрузкі, у выніку якіх траўмаваныя 3 чалавекі, загінула 18 сельскагаспадарчых жывёл. З прычыны сходу снегу і ледзяных утварэнняў з дахаў будынкаў траўмаваныя тры чалавекі.

Ратавальнікі рэкамендуюць уладальнікам жылых дамоў і дач сачыць за станам дзвярэй і вокнаў на верхніх паверхах. Калі яны пачалі дрэнна адчыняцца або іх перакасіла — гэта прыкмета дэфармацыі каркаса будынка пад цяжарам снегу. «Патрэскванне, рыпанне ў кроквеннай сістэме — сігнал да неадкладнай эвакуацыі і прафесійнага агляду. Не чакайце крытычнай масы, скідайце снег паступова. Выкарыстоўвайце спецыяльнае абсталяванне з зямлі, каб не падымацца на дах, або звярніцеся ў спецыялізаваныя арганізацыі. Пакідайце на даху невялікі пласт снегу (5-10 см), каб не пашкодзіць само дахавае пакрыццё інструментам. Перад пачаткам работ абгарадзіце зону падзення снегу. Пераканайцеся, што пад карнізамі няма людзей і не прыпаркаваныя аўтамабілі», — адзначылі ў МНС.

Нельга грэбаваць і мерамі асабістай бяспекі. «Зону падзення неабходна акрэсліць. Абгарадзіце тэрыторыю ўнізе яркай стужкай. Пры выхадзе на дах абавязкова выкарыстоўвайце страховачную прывязь. Прымацоўвайце трос толькі да надзейных канструкцый. Ніколі не мацуйцеся да комінаў, вентыляцыйных труб або тэлевізійных антэн — яны могуць абваліцца разам са снегам. Ніколі не працуйце на даху ў адзіночку. Унізе павінен знаходзіцца чалавек, які зможа выклікаць дапамогу ці папярэдзіць прахожых. Калі побач з домам праходзяць лініі электраперадачы, будзьце вельмі асцярожныя. Мокры снег — выдатны праваднік. Пры падзенні пласта снегу на правады магчымы іх абрыў і паражэнне токам», — падкрэслілі ў выратавальным ведамстве.

На сельскагаспадарчых і прамысловых аб’ектах варта асаблівую ўвагу ўдзяляць лёгкім канструкцыям. «Склады з металаканструкцый, арачныя ангары і цяпліцы маюць мінімальны запас трываласці. Для іх нават 20-30 см мокрага снегу могуць быць крытычнымі. Чысціць снег трэба раўнамерна з усіх схілаў. Калі ачысціць толькі адзін бок, узнікне небяспечны перакос нагрузкі, які можа «скласці» будынак. У месцах прымыкання розных узроўняў дахаў (каля ліхтароў, прыбудоў) снегу збіраецца больш за ўсё. Гэтыя зоны трэба чысціць у першую чаргу. Каля старых будынках устанавіце часовыя падтрымлівальныя стойкі (падпоркі) пад асноўныя бэлькі ў перыяды экстрэмальных снегападаў і нагрузак», — парэкамендавалі ратавальнікі.