У Дзяржаўтаінспекцыі падкрэслілі, што мотасезон пачынаецца са стараннай падрыхтоўкі тэхнікі, праверкі дакументаў і псіхалагічнага настрою на адказнае ваджэнне. «Першачарговым этапам падрыхтоўкі да мотасезона з’яўляецца праверка тэхнічнага стану транспартнага сродку. Пасля працяглага захоўвання неабходна пераканацца ў спраўнасці тармазной сістэмы, вонкавых светлавых прыбораў, стану шын і дастатковым узроўні тэхнічных вадкасцей. Эксплуатацыя няспраўнага матацыкла катэгарычна забаронена, паколькі любая тэхнічная недапрацоўка на двухколавым транспарце можа прывесці да страты кіравання і цяжкіх наступстваў», — акцэнтавалі ўвагу ва ўпраўленні ДАІ.

У матацыкліста абавязкова павінны быць вадзіцельскае пасведчанне катэгорыі А, пасведчанне аб рэгістрацыі транспартнага сродку і дагавор абавязковага страхавання грамадзянскай адказнасці.

«Асаблівую ўвагу варта ўдзяліць экіпіроўцы. Выкарыстанне ахоўнага шлема з’яўляецца абавязковым патрабаваннем як для вадзіцеля, так і для пасажыра. Шлем павінен быць правільна падабраны па памеры і надзейна зашпілены. Акрамя таго, рэкамендуецца выкарыстоўваць спецыяльную мотаэкіпіроўку з ахоўнымі ўстаўкамі і адзенне са святловяртальнымі элементамі. Гэта не толькі мінімізуе цяжкасць траўмаў у выпадку ДТЗ, але і робіць матацыкліста больш прыметным для вадзіцеляў аўтамабіляў у цёмны час сутак або пры дрэннай бачнасці», — растлумачылі ў ДАІ.

Матацыклістам настойліва рэкамендуюць прытрымлівацца максімальна стрыманага стылю ваджэння. Варта выконваць бяспечную скорасць руху і пазбягаць рэзкіх перастраенняў.

«Узаемапавага на дарозе — залог агульнай бяспекі. Вадзіцелям аўтамабіляў варта часцей глядзець у люстэркі задняга віду і загадзя ўключаць паказальнікі павароту, а матацыклістам — прагназаваць дарожную сітуацыю. Памятайце, высокая скорасць на матацыкле скарачае час на прыняцце рашэння і павялічвае тармазны шлях, які ў двухколавага транспарту часта даўжэйшы, чым у аўтамабіля», — рэзюмавалі ў абласной Дзяржаўтаінспекцыі.