У цырымоніі прынялі ўдзел памочнік Прэзідэнта — інспектар па Гродзенскай вобласці Канстанцін Бурак, старшыня Гродзенскага гарвыканкама Андрэй Хмель, настаяцель Свята-Пакроўскага кафедральнага сабора протаіерэй Рыгор Бяляцкі, дырэктар Гродзенскага філіяла РУП «Белпошта» Святлана Мякіш.

«У ХХ стагоддзі паштовая марка была найважнейшым інструментам для перадачы паведамленняў, а таксама папулярным аб’ектам калекцыянавання. З развіццём інфармацыйных тэхналогій яе роля кардынальна змянілася. Цяпер гэта ў большай ступені дакумент, які захоўвае памяць пакаленняў. І адначасова своеасаблівы механізм, які ўплывае на імідж і прасоўванне дзяржавы праз сімвалы і знакі, намаляваныя на марцы. Дзякуючы вялізным тыражам, гэта функцыя масава ўплывае на фарміраванне краінавага вобраза», — адзначыў Канстанцін Бурак.

Ён асабліва падкрэсліў, што серыя «Беларускі край» папоўнілася маркамі, прысвечанымі знакавым гісторыка-архітэктурным помнікам Гродзенскай вобласці — самага маленькага па тэрыторыі рэгіёну рэспублікі, але самага прыгожага і цікавага для гасцей нашай цудоўнай краіны, і што спецыяльнае гашэнне блока адбылося ў знакавы для Гродна Дзень вызвалення ад фашыстаў.

Выпуск тэматычнага блока, прысвечанага Гродзеншчыне, дапаможа яшчэ адным спосабам папулярызаваць Прынёманскі рэгіён і абласны цэнтр, сказаў Андрэй Хмель. «Марка — гэта мініяцюра, якая, разлятаючыся па краінах свету, можа расказаць людзям аб культурным, духоўным, турыстычным патэнцыяле Беларусі, — адзначыла Святлана Мякіш. — У праекце прадстаўлены самыя ўнікальныя месцы Прынёманскага краю, які называюць турыстычнай жамчужынай нашай рэспублікі. Ён дэманструе, што ў незалежнай Беларусі нашыя каштоўнасці захоўваюцца і рэстаўруюцца».

На марках намаляваны Каложская царква ў Гродне, Свята-Успенскі Жыровіцкі стаўрапігіяльны мужчынскі манастыр, царква Святога Міхала Арханёла ў вёсцы Сынкавічы. Паштовы блок таксама змяшчае выявы Старога замка ў Гродне, касцёла Святой Тройцы ў Гервятах, Аўгустоўскага канала, Мірскага і Лідскага замкаў, царквы Георгія Перамаганосца ў Гальшанах. Маркі выпушчаны тыражом 24 тыс. экзэмпляраў кожная.