«Акруговы суд Оўлу прысудзіў траіх палякаў да турэмнага зняволення тэрмінам крыху больш за два гады за крадзеж з абцяжарвальнымі абставінамі», — адзначаецца ў паведамленні фінскай тэлерадыёвяшчальнай кампаніі Yle.

Прысуды звязаныя з серыяй выбухаў банкаматаў, якія мужчыны зладзілі ў канцы 2024 года і ў пачатку 2025 года на захадзе Фінляндыі. Адзначаецца, што яны выкралі каля 200 тыс. еўра. Каля 146 тыс. еўра не знойдзены дагэтуль.

Па даных фінскай пракуратуры, грамадзяне Польшчы прыбылі ў Фінляндыю спецыяльна для здзяйснення маёмасных злачынстваў. У судзе яны прызналі сваю віну, у сувязі з чым тэрмін іх пакарання быў змякчаны.

Двое палякаў прысуджаныя да двух гадоў і трох месяцаў зняволення, а трэці атрымаў крыху больш кароткі тэрмін — два гады і адзін месяц. Іх таксама абавязалі выплаціць кампенсацыю за нанесеную шкоду.