Дакумент сваімі подпісамі засведчылі старшыня Дзяржстандарту Алена Маргунова і рэктар БНТУ Сяргей Харытончык.

Мэта пагаднення — інтэграцыя адукацыйнага працэсу і навукі з вытворчай практыкай, а таксама ўкараненне інавацыйнага, практыка-арыентаванага навучання. Да навучальнага працэсу плануецца актыўна прыцягваць вядучых спецыялістаў сістэмы Дзяржстандарту: яны будуць весці заняткі, кіраваць курсавымі і дыпломнымі праектамі, удзельнічаць у падагульняючай атэстацыі і размеркаванні выпускнікоў.

Праграма супрацоўніцтва таксама прадугледжвае арганізацыю навучальных і вытворчых практык для студэнтаў на базе арганізацый Дзяржстандарту, павышэнне кваліфікацыі і абмен вопытам, правядзенне сумесных навукова-даследчых работ, профільных семінараў і канферэнцый.

Алена Маргунова адразу нацэліла на сур’ёзную работу па выкананні дасягнутых дамоўленасцей: «У рамках гэтага пагаднення будзе падрыхтаваны план мерапрыемстваў з дакладна абазначанымі датамі і адказнымі выканаўцамі: будзем яго прытрымлівацца для таго, каб пагадненне атрымала рэальную практычную рэалізацыю. Мы гатовы аказваць любую кансультацыйную, метадалагічную дапамогу пры падрыхтоўцы студэнтаў. Выступаць з лекцыямі, кіраўнікамі практык, курсавых і дыпломных праектаў. У нас даволі шмат прафесіяналаў у стандартызацыі, метралогіі, ацэнцы адпаведнасці акрэдытацыі, сістэмным менеджменце».

Сяргей Харытончык адзначыў, што ў прадастаўленні сучасных ведаў важна ў першую чаргу зыходзіць з тых задач, якія стаяць перад Дзяржстандартам. Размова ідзе аб такіх напрамках, як забеспячэнне якасці і канкурэнтаздольнасці прадукцыі, абарона рынку, садзейнічанне экспарту. «І мы тут павінны быць наперадзе», — падзяліўся меркаваннем Сяргей Харытончык і запэўніў у выкананні пагаднення.

Цырымонія адбылася на тэрыторыі абноўленага музея БНТУ, адкрытага сёння. Непасрэдна работы па яго мадэрнізацыі праводзіліся на працягу паўтара года. Былі пашыраны залы музея і цяпер іх агульная плошча складае 300 кв. м.

Экспазіцыя прадстаўлена па блоках: «Заснаванне ўніверсітэта», «Вялікая Айчынная вайна», «Залаты век навукі», «Перыяд незалежнасці», «Сучаснасць». Для іх насычэння вывучаліся архівы, беражліва збіраліся дакументы, праводзіліся пошукавыя работы, прымяняліся сучасныя рашэнні. У планах — работа над гісторыяй даваеннага БНТУ. У залах музея налічваецца больш за 400 арыгіналаў дакументаў гісторыі вядучай тэхнічнай ВНУ краіны, многія з якіх — унікальныя артэфакты.

Музей быў адкрыты 1 верасня 1978 года, і яго абнаўленне — важны крок у гісторыі ВНУ і яе пазіцыянаванні як навучальнай установы, якая шануе традыцыі навукі і адукацыі, захоўвае гістарычную памяць.