Зламыснікі праніклі ў музей раніцай, разбіўшы акно. Сігналізацыя не спрацавала. На запісах з камер відэаназірання відаць, як двое рабаўнікоў па-варварску выразаюць карціны з рам. 

Паводле звестак мэрыі, было выкрадзена чатыры творы мастацтва, адзін з якіх быў кінуты падчас уцёкаў. Кошт выкрадзеных карцін ацэньваецца ў 9 млн еўра. Назвы выкрадзеных карцін пакуль не ўдакладняюцца.

Музей быў адкрыты ў 1960 годзе ў доме, дзе правёў свае апошнія гады мастак-імпрэсіяніст Агюст Рэнуар. У ім захоўваецца калекцыя, якая складаецца прыкладна з дзесяці арыгінальных карцін, каля сарака скульптур, а таксама мноства асабістых рэчаў мастака, у тым ліку яго мальберт і інваліднае крэсла.

На працягу апошніх гадоў у Францыі фіксуецца серыя буйных крадзяжоў з музеяў. У кастрычніку 2025 года з Луўра былі выкрадзены ювелірныя вырабы, якія належалі французскім манархам. Арыенціровачная шкода склала 88 млн еўра. Праз некалькі гадзін аналагічны інцыдэнт адбыўся ў музеі «Дом асветы Дэні Дзідро» ў Лангры. Зламыснікі выкралі калекцыю старадаўніх манет з золата і серабра. У выніку гэтых здарэнняў Міністэрства ўнутраных спраў рэспублікі ініцыявала ўзмацненне аховы на аб’ектах культурнай спадчыны і ў музеях краіны.