Замежнік кіраваў аўтамабілем Geely Emgrand. Яго спынілі супрацоўнікі ДАІ, якім пры праверцы ён прад’явіў выдадзенае ў іншай краіне пасведчанне кіроўцы сваяка. Было ўстаноўлена, што ў Беларусі мужчына пазбаўлены правоў за парушэнне правілаў дарожнага руху.

Па факце здарэння была ўзбуджана крымінальная справа. Падчас папярэдняга следства мужчына поўнасцю прызнаў сваю віну і раскаяўся ва ўчыненым злачынстве, актыўна садзейнічаў расследаванню справы. Раней да крымінальнай адказнасці ён не прыцягваўся, мае на ўтрыманні малалетніх дзяцей. Ад абвінавачанага і яго абаронцы паступіла хадайніцтва аб вызваленні ад крымінальнай адказнасці ў сувязі з тым, што ўчыненае ім злачынства не ўяўляе вялікай грамадскай небяспекі.

На падставе ўсіх названых абставін следчы Кастрычніцкага РАСК са згоды пракурора спыніў папярэдняе расследаванне і вызваліў мужчыну ад крымінальнай адказнасці. Адначасова пракурор вынес пастанову аб прымяненні адміністрацыйнага спагнання ў выглядзе штрафу ў максімальным памеры — 30 базавых велічынь (1,35 тысячы рублёў).

Пракуратура Гомельскай вобласці, вывучыўшы дадзеную справу, пагадзілася з прынятым рашэннем, прызнала яго законным і абгрунтаваным, а таксама адпаведным мэтам і задачам крымінальнага працэсу.