Згодна з матэрыяламі справы, 4 верасня 2025 года ў АУС адміністрацыі Ленінскага раёна Гродна паступіла паведамленне ад кіраўніцтва адной са школ горада аб тым, што ў непаўналетняга навучэнца пры візуальным аглядзе выяўлены цялесныя пашкоджанні. З прычыны дрэннага самаадчування хлопчык быў шпіталізаваны ў Гродзенскую абласную дзіцячую бальніцу. 

Падчас праверкі ўстаноўлена, што напярэдадні вечарам дома з-за дрэнных паводзін хлопчыка ў школе бацька нанёс свайму 14-гадоваму сыну не менш за 10 удараў кулаком па галаве і целе. Па заключэнні судова-медыцынскай экспертызы ў непаўналетняга ўстаноўлены цялесныя пашкоджанні ў выглядзе шматлікіх сінякоў на галаве, страсення галаўнога мозгу, якія ўтвараюць адзіны непадзельны комплекс чэрапна-мазгавой траўмы, а таксама шматлікія сінякі шыі, правага і левага плячэй, сцёгнаў, жывата, якія вызначаюцца як лёгкія цялесныя пашкоджанні па прыкмеце кароткачасовага расстройства здароўя. 

У ведамстве дадалі, што падазраваны раней прыцягваўся да крымінальнай адказнасці за хуліганскія дзеянні. 

Пацярпелы адмовіўся ад напісання заявы аб прыцягненні бацькі да крымінальнай адказнасці. Мужчына з’яўляецца адзіным законным прадстаўніком сына. Маці хлопчыка памерла.

У сілу таго, што супрацьпраўныя дзеянні выявіліся ў замаху на жыццё і здароўе непаўналетняга, які не здольны самастойна паўнавартасна абараняць свае правы і законныя інтарэсы, пракурор палічыў абгрунтаваным распачаць крымінальную справу прыватнага абвінавачвання без заявы пацярпелага. Для арганізацыі папярэдняга расследавання пракурор накіраваў крымінальную справу ў Гродзенскі міжраённы аддзел Следчага камітэта.

У цяперашні час падлетак, а таксама яго два малалетнія браты прызнаны маючымі патрэбу ў дзяржабароне, адабраны ў адзінага з бацькоў і змешчаны на дзяржаўнае забеспячэнне ў сацыяльна-педагагічны цэнтр.