За апошнія 5 гадоў у рэгіёне практычна падвоілася колькасць высокатэхналагічнага абсталявання: рэнтгенаўскіх камп’ютарных да 14, магнітна-рэзанансных тамографаў да 9, ангіяграфічных комплексаў — да 6, устаноўлены 2 лінейныя паскаральнікі электронаў. Медыцынскую дапамогу насельніцтву вобласці аказваюць 65 устаноў аховы здароўя, у т. л. Гродзенская ўніверсітэцкая клініка, 6 спецыялізаваных цэнтраў, 2 абласныя дыспансеры, 5 абласных, 3 гарадскія і 16 цэнтральных раённых бальніц, 9 гарадскіх паліклінік (у тым ліку 1 стаматалагічная), 18 цэнтраў гігіены, эпідэміялогіі і грамадскага здароўя, 5 іншых устаноў. Але за ўсімі гэтымі лічбамі стаяць людзі, якія кожны дзень клапоцяцца аб здароўі людзей.

Як адзначыў старшыня Гродзенскага аблвыканкама Юрый Караеў, клопат аб людзях — гэта прыярытэт дзяржаўнай палітыкі. Нягледзячы на любыя сучасныя выклікі, эканамічныя цяжкасці, Беларусь працягвае стваральнае мірнае развіццё. Паляпшаюцца гарады і населеныя пункты, штогод адкрываюцца новыя аб’екты і перш за ўсё ў сацыяльнай сферы. Фактычна напярэдадні прафесійнага свята медработнікаў з удзелам Прэзідэнта Рэспублікі Беларусь урачыста адкрыта новая абласная клінічная бальніца.

— Наша вобласць наблізілася да завяршэння рэарганізацыі рэгіянальнай сістэмы аховы здароўя на доўгатэрміновую перспектыву. Усё робіцца з клопатам аб пацыентах і медыцынскім персанале. Рэсурсаў мы не шкадуем. Гэтымі днямі медыцынскія работнікі атрымліваюць шмат віншаванняў. Фактычна кожнаму чалавеку ёсць каму дзякаваць за дапамогу, за падтрымку, за вернутае здароўе. А многія ўдзячныя за выратаванае жыццё, за сваё другое нараджэнне. Людзі шануюць не толькі прафесіяналізм урачоў і медсясцёр. Не менш важна праяўленае спачуванне, словы падтрымкі, клопат, аптымізм. Медыцына — гэта праца па прызванні, здольнасць ахвяраваць сабой дзеля выратавання іншых, — адзначыў кіраўнік вобласці. 

Па словах начальніка галоўнага ўпраўлення аховы здароўя Людмілы Кеды, усе новаўвядзенні накіраваны на карысць насельніцтва. І самым галоўным рэсурсам, як у любой галіне, з’яўляецца чалавек.

— Усе мы, аднойчы звязаўшы сваё жыццё з медыцынай, святкуем гэты дзень з асаблівым пачуццём. У гэты дзень мы прымаем віншаванні ад удзячных пацыентаў, родных, блізкіх, сяброў, а таксама нароўні з гэтым аналізуем зробленае. Дакладна прытрымліваючыся задачы, пастаўленай Прэзідэнтам нашай краіны. Выратаваць, захаваць і ўмацаваць здароўе чалавека, забяспечыць якасную і даступную медыцынскую дапамогу. І медыцына Гродзеншчыны дынамічна развіваецца і ўдасканальваецца, — звярнулася Людміла Кеда да гасцей свята.

Напрыканцы ўрачыстасці медыцынскія работнікі Гродзенскай вобласці выказалі падзяку за высокую ацэнку іх працы і паабяцалі прадаўжаць нястомна клапаціцца аб здароўі людзей. Свята завяршылася апладысментамі і цёплымі словамі, пакінуўшы ў сэрцах усіх прысутных пачуццё глыбокай павагі і ўдзячнасці да тых, хто кожны дзень стаіць на варце жыцця і здароўя. Наперадзе ў медыкаў новыя выклікі і дасягненні, але адно застаецца нязменным — іх самаадданасць, прафесіяналізм і жаданне рабіць свет лепшым. 

Вераніка КАЗЛОЎСКАЯ

Фота «Гродзенскай праўды»