У Лідзе адбылося выязное пасяджэнне Пастаяннай камісіі Палаты прадстаўнікоў па міжнародных справах. На парадку дня былі пытанні практыкі прымянення заканадаўства Рэспублікі Беларусь у сферы развіцця знешнеэканамічнай дзейнасці. Часткай праграмы стала наведванне СТАА «Бел-Пласт Інтэрнэшнл» — прадпрыемства, якое ва ўмовах санкцыйнага ціску паспяхова развіваецца і, як і раней, вядзе бізнес пры падтрымцы польскіх партнёраў, як гэта было і заўсёды.

СТАА «Бел-Пласт Інтэрнэшнл», беларуска-польскае прадпрыемства, было заснавана ў 1999 годзе. Яго ўзначальвае дэпутат абласнога Савета дэпутатаў, старшыня праўлення Асацыяцыі польскага бізнесу ў Беларусі Анатоль Вялікін. Ён адзначыў, што за час работы беларуска-польскае прадпрыемства дабілася значных поспехаў. І гэта — выдатны прыклад прымянення механізмаў абароны добрасумленных інвестараў, стварэння ўмоў для стабільнай работы экспартаарыентаваных прадпрыемстваў і арганізацый, выканання планаў сацыяльна-эканамічнага развіцця.

Як адзначыў старшыня Пастаяннай камісіі па міжнародных справах Сяргей Рачкоў, Ліда і Лідскі раён вядомы ў першую чаргу сваімі прадпрыемствамі. Так што гэты рэгіён быў выбраны невыпадкова для правядзення пасяджэння.

— Гэты рэгіён актыўна супрацоўнічае з больш чым 80 дзяржавамі і экспартуе сваю прадукцыю. Паколькі многія прадпрыемствы ў гэтым рэгіёне арыентаваны на экспарт, важна зразумець, наколькі эфектыўныя меры, якія мы, дэпутаты Палаты прадстаўнікоў, прымаем для падтрымкі экспарту праз заканадаўства. Неабходна выявіць цяжкасці і праблемы, а таксама вызначыць, якія аспекты заканадаўства патрабуюць дапрацоўкі. У сучасным свеце сітуацыя даволі складаная. У працэсе ўзаемадзеяння з нашымі замежнымі партнёрамі мы заўважаем, што канкурэнцыя ўзмацняецца, асабліва ў сферы знешнеэканамічнай дзейнасці. Мы павінны не толькі адпавядаць бягучым тэндэнцыям, але і апярэджваць іх, каб наша прадукцыя была канкурэнтаздольнай і паспяхова прадавалася на знешніх рынках. На прыкладзе Ліды мы можам убачыць, што ў нас атрымліваецца і якія задачы яшчэ трэба вырашыць, — адзначыў Сяргей Рачкоў

• Ён звярнуў увагу, што Прэзідэнт Беларусі Аляксандр Лукашэнка на цырымоніі інаўгурацыі адзначыў, што моцная эканоміка — наша палітыка і залог поспеху, а перспектыўныя інвестыцыйныя праекты, інавацыйныя вытворчасці, новыя рабочыя месцы — базісныя задачы будучай пяцігодкі.

Абмеркаванне ў рамках пасяджэння, несумненна, дапамагло ўбачыць, на чым варта акцэнтаваць увагу. Было карысным таксама вывучыць досвед працы СТАА «Бел-Пласт Інтэрнэшнл», дырэктар якога прымае актыўны ўдзел не толькі ў эканамічным жыцці краіны, але і працуе як дэпутат.

Вераніка Казлоўская.