У МУС Грузіі паведамілі, што «кіроўца затрыманы, але на дадзеным этапе яго нельга перавесці ў ізалятар, паколькі ён праходзіць неабходныя медыцынскія працэдуры ў клініцы». 

Паводле папярэдніх звестак, за рулём мікрааўтобуса знаходзіўся грамадзянін Грузіі. «Міністэрства ўнутраных спраў пачало расследаванне паводле артыкула 276, які датычыцца парушэння правілаў дарожнага руху, што пацягнула за сабой гібель чалавека», — гаворыцца ў публікацыі.

Дарожна-транспартнае здарэнне з удзелам мікрааўтобуса, які перавозіў беларускіх грамадзян, адбылося раней у грузінскім рэгіёне Гурыя. Паводле папярэдніх звестак МУС Грузіі, кіроўца мікрааўтобуса не забяспечыў бяспечнае кіраванне транспартным сродкам, у выніку чаго мікрааўтобус з’ехаў з дарогі і ўпаў у цясніну. Усяго ў транспартным сродку знаходзіліся 19 грамадзян Беларусі. У выніку аварыі чатыры чалавекі загінулі, 15 атрымалі траўмы рознай ступені цяжкасці. Сярод пацярпелых шасцёра непаўналетніх.