Вытворчасць мацарэлы з буйвалінага малака залежыць ад строга рэгламентаванага ланцужку паставак. Буйваліц неабходна даіць незалежна ад таго, ці працуюць малочныя заводы, а правілы вытворчасці патрабуюць, каб іх малако было перапрацавана ў мацарэлу на працягу 60 гадзін.

П’ер Марыя Сакані, дырэктар Consorzio di Tutela Mozzarella di Bufala Campana DOP, заявіў, што каля 1 млн л буйвалінага малака, вырабленага 21 кастрычніка, не ўдалося перапрацаваць у мацарэлу з-за транспартнай блакады. Паводле яго слоў, страта склала 3 млн еўра за 24 гадзіны.

Сакані адзначыў, што некаторыя малочныя заводы былі зачыненыя. Ён ахарактарызаваў сітуацыю, якая склалася як «поўную вытворчую блакаду».

Адзначаецца, што вытворцы малака і малочнай прадукцыі і так ужо сутыкаюцца з эканамічнымі праблемамі. Паводле ацэнак спецыялістаў, вытворчыя выдаткі выраслі прыкладна на 30%, што абумоўлена павелічэннем кошту кармоў для жывёл, дызельнага паліва, энергіі, пластыкавай упакоўкі і транспарту.

Па словах Сакані, сітуацыя ўскладняецца тым, што вытворцы не пераклалі гэтыя ўзрослыя выдаткі цалкам на канечных пакупнікоў. Асноўны фінансавы ўдар прыпаў на прадпрыемствы, што ў выніку прывяло да зніжэння прыбытку па ўсім ланцужку паставак.

Пратэст дальнабойшчыкаў, які пачаўся 16 кастрычніка, парушыў паўсядзённае жыццё італьянцаў. Гэта выклікала перабоі з пастаўкамі харчавання: у крамах на поўдні Італіі апусцелі паліцы, паўстаў дэфіцыт свежай агародніны, садавіны, малака, яек, мяса, хлеба і макаронных вырабаў. Асабліва складаная сітуацыя — у Неапалі. На многіх АЗС узнік дэфіцыт паліва, што выклікала ажыятаж. Людзі стаяць у шматкіламетровых чэргах, каб заправіцца.