У Івацэвіцкі РАУС 53-гадовы жыхар раёна паведаміў, што невядомы нанёс яму цялесныя пашкоджанні. Праваахоўнікі ўстанавілі, што мужчына ехаў на веласіпедзе паблізу адной з вёсак раёна. У гэты час міма яго на легкавушцы са сваёй знаёмай праязджаў 21-гадовы непрацуючы жыхар суседняй вёскі, які раней трапляў у поле зроку праваахоўнікаў. 

У нейкі момант малады чалавек апусціў шкло з пасажырскага боку і зрабіў не менш за тры стрэлы металічнымі шарыкамі з пнеўматычнага пісталета па веласіпедысце.

У гутарцы з супрацоўнікамі міліцыі зламыснік растлумачыў, што набыў пнеўматычны пісталет і камплектуючыя да яго ў інтэрнэт-краме, а па незнаёмым мужчыне страляў дзеля забавы. Дома ў фігуранта праваахоўнікі выявілі і канфіскавалі пнеўматычны пісталет, сем металічных балонаў, пластыкавую ёмістасць з металічнымі шарыкамі.

Следчымі заведзена крымінальная справа за асабліва злоснае хуліганства. У дачыненні да фігуранта абраная мера стрымання ў выглядзе заключэння пад варту. Санкцыя артыкула прадугледжвае да 10 гадоў пазбаўлення волі.