У Ізраілі міністр аховы навакольнага асяроддзя Ідыт Сільман змяніла прававы статус нільскіх кракадзілаў, абвясціўшы іх «культыраванымі дзікімі жывёламі», каб нацыянальная турэмная служба магла выкарыстоўваць рэптылій для аховы перыметра турмаў у краіне. Пра гэта паведамляе газета The Jerusalem Post.
Ініцыятыва належыць міністру нацыянальнай бяспекі Ітамару Бэн-Гвіру, які задумаў размясціць кракадзілаў у равах вакол турмаў, дзе ўтрымліваюцца зняволеныя, арыштаваныя ў сувязі з рызыкамі нацыянальнай бяспекі. Пілотны праект планавалася запусціць у турме Кецыёт, аднак Упраўленне прыроды і паркаў выступіла супраць ідэі, заявіўшы, што дзікіх жывёл, паводле заканадаўства, можна ўтрымліваць толькі ў адукацыйных, даследчых або інфармацыйных мэтах, а не для аховы.
Каб абысці закон, Сільман вырашыла рэанімаваць старую норму аб магчымасці камерцыйнага развядзення кракадзілаў і стварыць новую катэгорыю для жывёл, якія змяшчаюцца ва ўстановах у мэтах бяспекі. Яна праігнаравала заключэнне свайго ж юрыдычнага саветніка Нэты Дроры, якая лічыць, што для гэтага патрабуецца не міністэрскае рашэнне, а распрацоўка паўнавартаснага заканадаўства. Дроры адзначыла, што ў свеце няма прэцэдэнтаў выкарыстання кракадзілаў у сучасных турмах — прыклады ЗША і некаторых краін Паўднёвай Амерыкі аказаліся правальнымі, паколькі там гэта былі кароткачасовыя эксперыменты.
Чыноўнікі падкрэсліваюць, што ў супрацоўнікаў турмаў няма досведу абыходжання з небяспечнымі драпежнікамі, а развядзенне кракадзілаў у мінулым ужо прыводзіла да іх уцёкаў і пагрозы для жыцця людзей. У бліжэйшы час пытанне будзе вынесена на пленум Упраўлення прыроды і паркаў краіны.
