ДТЗ адбылося ў канцы кастрычніка мінулага года на вул. Савецкай у Калінкавічах. Жыхар Жыткавічаў праявіў няўважлівасць пры набліжэнні да нерэгуляванага пешаходнага пераходу, пазначанага дарожнымі знакамі і адпаведнай разметкай. У левай суседняй паласе зменшыў хуткасць і спыніўся GAZ, што для абвінавачанага павінна было стаць знакам — на праезную частку могуць выйсці пешаходы. Аднак ён не ўлічыў гэтага. Рухаючыся з хуткасцю больш за 65 км/г пры дазволенай на гэтым участку дарогі не больш за 40 км/г, не спыніўся і не прадаставіў перавагу 29-гадовай жанчыне, якая ішла па пешаходным пераходзе з каляскай, у якой знаходзілася дзіця, і ўчыніў наезд. Жанчына атрымала цяжкія цялесныя пашкоджанні. Дзіця не пацярпела. 

Мужчына раней не судзімы, пры гэтым неаднаразова прыцягваўся да адміністрацыйнай адказнасці, у тым ліку за перавышэнне хуткаснага рэжыму.

У судовым пасяджэнні кіроўца прызнаў віну ў поўным аб’ёме і раскаяўся ў зробленым. З улікам прадстаўленых дзяржаўным абвінаваўцам доказаў суд Калінкавіцкага раёна на падставе ч. 2 арт. 317 КК прызначыў пакаранне ў выглядзе двух з паловай гадоў абмежавання волі з накіраваннем у папраўчую ўстанову адкрытага тыпу. Абвінавачаны на 5 гадоў пазбаўлены права займацца дзейнасцю, звязанай з кіраваннем усімі відамі транспарту. На карысць пацярпелай з уладальніка аўтамабіля спагнана Br30 тыс. грашовай кампенсацыі маральнай шкоды. 

Прысуд у законную сілу не ўступіў, можа быць абскарджаны і пратэставаны ў апеляцыйным парадку.