«Падрыхтоўка міжнароднай перавозкі складаецца з мноства дзеянняў. Адно з іх — атрыманне неабходнага дазволу на праезд па тэрыторыі замежнай дзяржавы. У транспартных зносінах з Кітаем гэты этап становіцца больш зручным: атрыманне дазволаў цяпер даступна праз асабісты кабінет перавозчыка. У АІС „Дазвол“ прадугледжаны атрыманне электроннага дазволу, замацаванне вадзіцеля пры неабходнасці і актывацыя дазволу перад рэйсам. Наведваць філіял Транспартнай інспекцыі менавіта для атрымання такога дазволу не спатрэбіцца. Вяртаць выкарыстаны бланк у інспекцыю таксама не трэба: выкарыстанне электроннага дазволу пацвярджаецца аўтаматычна па звестках кітайскага боку», — растлумачылі ў ведамстве.

Спецыялісты звярнулі ўвагу, што атрыманне і актывацыя — розныя этапы. Каб дазвол быў гатовы да выкарыстання, перавозчык уносіць звесткі аб планаванай перавозцы ў АІС «Дазвол», якая ў сваю чаргу накіроўвае інфармацыю для рэгістрацыі ў інфармацыйную сістэму КНР. З кітайскім бокам дасягнута дамоўленасць аб выдачы электронных дазволаў без абмежаванняў па агульнай колькасці. Гэта дазваляе перавозчыкам планаваць работу зыходзячы з наяўных заказаў і стварае дадатковыя ўмовы для росту аб’ёмаў перавозак паміж краінамі.

Пры гэтым колькасць адначасова актываваных і яшчэ не выкарыстаных дазволаў абмежавана двума кожнага віду на адзін канкрэтны грузавы транспартны сродак. Калі дазволы афармляюцца пад ужо запланаваныя перавозкі, такі парадак у цэлым не стварае цяжкасцяў для перавозчыка.

«Пасля актывацыі фарміруецца інфармацыйны дакумент. У ім пазначаны ўнікальны нумар, прысвоены кітайскай сістэмай, QR-код і рэквізіты перавозкі. Вадзіцель можа прад’явіць яго пры транспартным кантролі на экране мабільнай прылады або ў раздрукаваным выглядзе. Для перавозчыка гэта зручны спосаб перадаць вадзіцелю звесткі аб падрыхтаваным дазволе, для вадзіцеля — магчымасць выбраць прыдатны фармат прад’яўлення дакументаў. Пры гэтым страта або пашкоджанне раздрукоўкі не азначае страту самога дазволу: электронны запіс захоўваецца ў інфармацыйнай сістэме, а інфармацыйны дакумент пры неабходнасці можна раздрукаваць паўторна», — расказалі ў транспартнай інспекцыі.

Да 31 студзеня 2027 года пры выкарыстанні электроннага дазволу рэкамендуецца мець у кабіне папяровы дазвол КНР. Ён служыць рэзервам на выпадак тэхнічнага збою ці праблемы пры праверцы электроннага запісу.

«Не варта блытаць два дакументы. Раздрукоўка інфармацыйнага дакумента з QR-кодам пацвярджае выдачу і актывацыю электроннага дазволу. Рэзервовы папяровы дазвол КНР — асобны дазвольны дакумент. Калі перавозчык раней атрымаў папяровы дазвол, ён застаецца сапраўдным да заканчэння свайго тэрміну. Абавязковага пераафармлення ў электронны выгляд не патрабуецца», — дадалі ў транспартнай інспекцыі.

Для кампаніі пераход на электронныя дазволы азначае менш арганізацыйных дзеянняў для атрымання дазволу і пацвярджэння яго выкарыстання. Няма неабходнасці адпраўляць прадстаўніка ў філіял Транспартнай інспекцыі па атрыманне або для вяртання бланка. Часцяком перавозчык размяшчаецца на значным аддаленні ад філіялаў Транспартнай інспекцыі, часам у іншым горадзе за сотні кіламетраў. Цяпер жа работу з дакументам можна весці прама праз асабісты кабінет АІС «Дазвол». Для вадзіцеля гэта магчымасць прад’яўляць звесткі аб актываваным дазволе ў электронным выглядзе або на раздрукоўцы. Спрашчаецца перадача дакумента ад офіса да аўтамабіля, хоць рэзервовы папяровы парадак на пераходны перыяд захоўваецца.

Для дзяржавы гэта больш празрыстая сувязь паміж выдачай дазволу і звесткамі аб яго выкарыстанні, для краіны ў цэлым — развіццё лічбавых сэрвісаў, неабходных для сучасных міжнародных перавозак і абслугоўвання знешняга гандлю.

«Беларуска-кітайскі праект адпавядае міжнароднай практыцы: электронныя дазволы прымяняюцца ў зносінах Казахстана і Узбекістана з Кітаем, а таксама на напрамку Турцыя — Узбекістан», — звярнулі ўвагу ў Транспартнай інспекцыі.