Дуаньу, які таксама называюць «падвойнай пяцёркай», прыпадае на пяты дзень пятага месяца па месяцовым календары. Гэта кітайскае традыцыйнае свята каляндарнага цыклу. У маі 2006 года Дзяржаўны савет КНР уключыў Свята Дуаньу ў першы спіс нацыянальнай нематэрыяльнай культурнай спадчыны. З 2008-га яно стала дзяржаўным святам. У верасні 2009 года ЮНЕСКА афіцыйна зацвердзіла яго ўключэнне ў «Рэпрэзентатыўны спіс нематэрыяльнай культурнай спадчыны чалавецтва». Дуаньу стала першым кітайскім святам, уключаным у Спіс сусветнай нематэрыяльнай спадчыны.

Галоўнае святочнае мерапрыемства — гонкі па рацэ на лодках-«драконах», паглядзець на якія выходзяць практычна ўсе. Пасля спаборніцтваў кітайцы традыцыйна частуюцца цзунцзы — гэта рыс з рознымі начыннямі, загорнуты ў бамбукавае лісце. З нагоды свята ў КНР трохдённыя канікулы.