Кітай пабудаваў больш за 7000 сучасных інтэлектуальных заводаў і стаў найбуйнейшай у свеце базай для прымянення інтэлектуальных вытворчых тэхналогій. Аб гэтым паведамілі ў Міністэрстве прамысловасці і інфарматызацыі КНР, перадае «Сіньхуа».
Як адзначыў намеснік міністра прамысловасці і інфарматызацыі Сінь Габінь, дзякуючы галіновым падыходам і шматузроўневаму развіццю ў Кітаі пабудавалі больш за 500 інтэлектуальных заводаў найвышэйшага ўзроўню. 15 прадпрыемстваў былі адабраны для ўдзелу ў праграме развіцця інтэлектуальных заводаў флагманскага ўзроўню.
Кітай распрацаваў глабальныя магчымасці паставак сістэмных рашэнняў. Агульны прамысловы маштаб інтэлектуальнага вытворчага абсталявання, прамысловага праграмнага забеспячэння і сістэмных рашэнняў перавысіў 4,5 трлн юаняў.
Пастаўшчыкі інтэлектуальных рашэнняў для сістэм вытворчасці аўтамабіляў, акумулятарных батарэй і нафтахімічнай прамысловасці паскараюць сваю глабальную экспансію, ствараючы сэрвісныя сеткі, якія ахопліваюць асноўныя вытворчыя рэгіёны па ўсім свеце. Іх высокаадаптыўныя і эканамічныя прапановы надаюць новы імпульс развіццю глабальнай вытворчай галіны.
У 2024 годзе ў Кітаі пачалі рэалізацыю праграмы паэтапнага развіцця «разумных» заводаў. Згодна з ёй інтэлектуальныя заводы будуць дзяліцца на чатыры катэгорыі: базавы, прасунуты, перадавы і піянерскі.
