Найбуйнейшыя электронныя гандлёвыя пляцоўкі Кітая актыўна развіваюць паслугі імгненнай розніцы, заснаваныя на мадэлі «анлайн-заказ, лакальная пастаўка, хуткая дастаўка», каб задаволіць вялікі попыт спажыўцоў на зручнасць і хуткасць. Па прагнозах Інстытута міжнароднага гандлю і эканамічнага супрацоўніцтва пры Міністэрстве камерцыі КНР, да 2030 года аб’ём рынку імгненнай розніцы перавысіць 2 трлн юаняў. 

Ключавым элементам сістэмы сталі размеркавальныя сховішчы — кампактныя гандлёвыя пункты, якія працуюць толькі анлайн, але здольныя захоўваць да 15 тысяч найменняў тавараў. Яны размяшчаюцца максімальна блізка да спажыўцоў і фарміруюць асартымент з улікам мясцовай спецыфікі: каля бальніц захоўваюць медыцынскія тавары, побач з турыстычнымі аб’ектамі — рыштунак для актыўнага адпачынку.

Па стане на другі квартал гэтага года інтэрнэт-кампанія Meituan стварыла па ўсім Кітаі больш за 50 тыс. такіх сховішчаў. Чакаецца, што да 2027-га іх колькасць дасягне 100 тыс. З пачатку бягучага года сетка сховішчаў сэрвісу Taobao Flash Shopping з хуткай дастаўкай таксама імкліва развіваецца: іх колькасць ужо перавысіла 50 тысяч, а аб’ём заказаў вырас больш як на 360 % у гадавым вылічэнні.

Платформы імгненнай розніцы аб’ядноўваюць не толькі ўласныя сховішчы, а і традыцыйныя крамы. Для афлайн-рытэйлераў гэта адкрывае доступ да маладой аўдыторыі, якая аддае перавагу анлайн-пакупцы. Да прыкладу, сетка супермаркетаў Shuntianfu у Пекіне адзначае значны рост заказаў пасля падключэння да платформы Taobao Flash Shopping: прыкметна павялічылася колькасць пакупнікоў пакаленняў 1990-х і 2000-х гадоў нараджэння.

Першапачаткова праз імгненную розніцу прадаваліся ў асноўным прадукты харчавання і тавары першай неабходнасці. Сёння асартымент уключае электроніку, касметыку, тавары для дзяцей і хатніх жывёл. Як адзначыў навуковы супрацоўнік даследчага інстытута Meituan Ван Кай, імгненны рознічны гандаль трансфармаваўся з канала экстранных пакупак у паўнавартасную частку паўсядзённага жыцця кітайскіх спажыўцоў.