Кітайскі сельскагаспадарчы ўніверсітэт стаў першай у краіне навучальнай установай, якая адкрыла бакалаўрскую праграму па падрыхтоўцы спецыялістаў для працы з хатнімі жывёламі, перадае «Жэньмінь жыбаа» анлайн». 

Новая спецыяльнасць «Жывёлагадоўля (жывёлы-кампаньёны)» выклікала шырокую цікавасць сярод інтэрнэт-карыстальнікаў у перыяд падачы дакументаў абітурыентамі. Праграма разлічана на чатыры гады навучання з прысваеннем ступені бакалаўра сельскагаспадарчых навук. Сёлета ўніверсітэт плануе прыняць 50 студэнтаў, якія будуць падзелены на дзве групы. Першы год навучання пройдзе ў галоўным кампусе ў Пекіне, наступныя тры гады — у Яньтайскім даследчым інстытуце ў правінцыі Шаньдун (Усходні Кітай).

Прарэктар Інстытута жывёлагадоўлі Лю Гошы растлумачыў, што новая спецыяльнасць арыентавана на патрэбнасці індустрыі жывёл-кампаньёнаў (у тым ліку сабак, катоў, коней і іншых гадаванцаў), якая хутка развіваецца. Навучальная праграма ахоплівае селекцыю парод, метабалізм і харчаванне, вытворчасць кармоў, фізіялогію размнажэння, паводзіны жывёл.

Аснову вучэбнай праграмы складаюць: харчаванне і кармы для жывёл-кампаньёнаў, селекцыя і развядзенне, эталогія, догляд за гадаванцамі, іпалогія і конегадоўля, а таксама сучасныя метады развядзення. Ключавое адрозненне праграмы ад традыцыйнай жывёлагадоўлі заключаецца ў акцэнте на хатніх гадаванцах замест сельскагаспадарчых жывёл.

З’яўленне новай спецыяльнасці абумоўлена імклівым ростам кітайскага рынку хатніх жывёл і тавараў для іх, які ў мінулым годзе перавысіў 300 млрд. юаняў са сярэднегадавым тэмпам росту 11,9% за апошняе дзесяцігоддзе. У краіне зарэгістравана больш за 500 тысяч кампаній, звязаных з адпаведнай індустрыяй, што стварае высокі попыт на кваліфікаваных спецыялістаў у гэтай сферы.