Кітайскі прамысловы гігант па вытворчасці дронаў, кампанія DJI, выходзіць на рынак інтэлектуальнай бытавой тэхнікі для хатняй прыборкі. Прадпрыемства прадставіла сваю першую лінейку мадэляў робатаў-прыбіральшчыкаў, пашырыўшы тым самым свае тэхналагічныя кампетэнцыі за межы лятучых прылад, перадае «Сіньхуа».

Новая лінейка прадукцыі пад назвай DJI ROMO сумяшчае ў сабе функцыі сухой і вільготнай прыборкі, выкарыстоўваючы запатэнтаваныя кампаніяй тэхналогіі сэнсарнага ўспрымання навакольнага асяроддзя і інтэлектуальнага планавання маршруту, першапачаткова распрацаваныя для беспілотнікаў. ROMO — гэта першая стратэгічная трансфармацыя DJI ад паветранага інтэлекту да сцэнарыя хатняй прыборкі, заявіла прадстаўнік кампаніі Чжан Сяанань. Яна адзначыла, што, нягледзячы на тое, што бытавыя памяшканні па сваіх умовах адрозніваюцца ад паветранага асяроддзя, асноўны прынцып застаецца ранейшым — прымяненне інтэлектуальнай навігацыі, сэнсарнага ўспрымання і дакладнага кіравання для больш эфектыўнага і разумнага абслугоўвання людзей. 

Тэхналогіі, назапашаныя DJI у галіне дронаў, дазваляюць вырашаць ключавыя праблемы, з якімі сутыкаецца галіна робатаў-прыбіральшчыкаў. Згодна з заявай DJI, серыя ROMO, як чакаецца, выйдзе на замежныя рынкі ў канцы гэтага года.

Паводле звестак даследчай кампаніі IDC, сусветныя пастаўкі робатаў-прыбіральшчыкаў летась дасягнулі 20,6 мільёна адзінак, павялічыўшыся на 11,2 працэнта ў параўнанні з папярэднім годам. Сёлета за першы квартал глабальныя пастаўкі склалі 5,1 млн адзінак, павялічыўшыся на 11,9 працэнта ў гадавым вылічэнні. Кітайскія брэнды Roborock, Ecovacs, Dreame і Xiaomi занялі чатыры з пяці лідзіруючых пазіцый па аб’ёме сусветных паставак.