Па дадзеных Шанхайскай мытні, экспарт сінтэтычных алмазаў з Кітая ў апошнія гады імкліва расце. У першым паўгоддзі аб’ём экспарту па звычайным гандлі праз Шанхайскую алмазную біржу дасягнуў 1,41 млрд юаняў, што на 65,3% больш у параўнанні з аналагічным перыядам мінулага года, паведаміла «Жэньмінь жыбаа» анлайн .
Шанхайская алмазная біржа, заснаваная ў 2000 годзе, з’яўляецца адзінай у мацерыковым Кітаі платформай для імпарту і экспарту алмазаў і адносіцца да дзяржаўных ключавых рыначных структур. Як адзначыў прэзідэнт біржы Лін Цян, раней асноўную долю складаў імпарт прыродных алмазаў, аднак за апошнія пяць гадоў кітайскія вырашчаныя алмазы занялі лідзіруючыя пазіцыі, і зараз на іх долю прыпадае больш за 60% сусветнай вытворчасці.
Кітайскія сінтэтычныя алмазы ўсё часцей становяцца папулярным выбарам для паўсядзённых упрыгожванняў і падарункаў на еўрапейскім і амерыканскім рынках, дзякуючы чаму ўмацоўваюцца пазіцыі Кітая як галоўнага сусветнага вытворцы. Адначасова рост кітайскіх магутнасцяў не толькі задавальняе новы міжнародны попыт, але і адкрывае шырокія магчымасці для краін з традыцыйнымі сектарамі агранкі і шліфоўкі алмазаў, у прыватнасці для Індыі.
Асобай увагі заслугоўвае тое, што прамысловая каштоўнасць кітайскіх вырашчаных алмазаў выходзіць за рамкі ювелірнай справы і накіроўваецца ў шырэйшую тэхналагічную сферу. Як паведамляюць галіновыя кампаніі, ужыванне вырашчаных алмазаў у інтэгральных схемах, вылічэннях для штучнага інтэлекту, магутных лазерах, высокачастотных фільтрах і квантавых тэхналогіях набывае ўсё большае значэнне і можа стаць другой ключавой галіной іх развіцця.
Мікалай ЛІТВІНАЎ
