Так, толькі за адзін дзень 20 кастрычніка кітайскае клірынгавае агенцтва NetsUnion апрацавала 4,64 млрд плацежных аперацый, устанавіўшы новы рэкорд па колькасці транзакцый, апрацаваных за адзін дзень.
Па даных кампаніі, да піку спажывецкіх плацежных транзакцый прывялі аплата заказаў, аформленых загадзя, а таксама актыўныя пакупкі тавараў, якія ёсць у наяўнасці на платформах электроннай камерцыі.
З сярэдзіны кастрычніка кітайскія платформы электроннай камерцыі пачалі штогадовы маштабны распродаж, які звычайна суправаджаецца вялікімі скідкамі і шырокамаштабнымі акцыямі. Гэта прывяло да росту колькасці заказаў і аб'ёму плацяжоў.
Сёлета распродажы з нагоды «Дня халасцяка» на платформе JD.com пачаліся 12 кастрычніка. У першы дзень колькасць карыстальнікаў, якія аформілі замовы, паказала двухзначны рост у гадавым вылічэнні. Акрамя прадукцыі для дома, падарожжаў і здароўя, платформа надае ўвагу новым спажывецкім запытам, звязаным з доглядам пажылых людзей, тавараў для хатніх жывёл і тэхналогіямі штучнага інтэлекту.
Між тым іншы кітайскі гігант электроннай камерцыі Tmall сабраў для цяперашняга распродажу 1 млн брэндаў і больш за 72 млн найменняў тавараў, пры гэтым абодва паказчыкі сталі рэкорднымі.
Шопінг-фестываль з нагоды «Дня халасцяка» звычайна доўжыцца каля месяца і завяршаецца ў сярэдзіне лістапада.
Распродаж праходзіць на фоне паступовага аднаўлення спажывецкай актыўнасці, на якое паказваюць апошнія статыстычныя даныя. Паводле афіцыйных даных, за першыя тры кварталы 2026 года агульны аб'ём рознічных продажаў тавараў і паслуг у Кітаі вырас на 2,6 працэнта ў гадавым параўнанні. Пры гэтым продажы паслуг раслі хутчэй, чым продажы тавараў, і адначасова працягвалі развівацца новыя фарматы спажывання.
Дзяржаўны камітэт па справах развіцця і рэформ КНР паведаміў, што будзе сумесна з адпаведнымі ведамствамі прымаць больш актыўныя і эфектыўныя меры для пашырэння ўнутранага попыту, умацавання асноў і падтрымання дынамікі ўстойлівага аднаўлення эканомікі. Як растлумачылі ў дзяржкамітэце, улады маюць намер павялічыць долю бюджэтных расходаў на грамадскія паслугі, узмацніць інклюзіўную палітыку, непасрэдна арыентаваную на спажыўцоў, а таксама садзейнічаць пашырэнню і мадэрнізацыі спажывання тавараў, у тым ліку транспартных сродкаў на новых крыніцах энергіі і інтэлектуальнай прадукцыі.
Мікалай ЛІТВІНАЎ
