З цэнтральнага бюджэту Кітая было выдзелена звыш мільярда юаняў на аказанне дапамогі некалькім раёнам правінцыяльнага ўзроўню ў барацьбе з паводкай і засухай. Аб гэтым паведамілі ў Міністэрстве фінансаў КНР, перадае «Сіньхуа».

Грашовыя сродкі, сумесна выдзеленыя Міністэрствам фінансаў КНР, Міністэрствам сельскай гаспадаркі і сельскіх спраў Кітая і Міністэрствам воднай гаспадаркі КНР, накіраваны на ліквідацыю наступстваў разгулу воднай стыхіі ў розных рэгіёнах, уключаючы Пекін, аўтаномны раён Унутраная Манголія, а таксама правінцыю Хэбэй.

Выдзеленыя сродкі таксама пойдуць на барацьбу з засухай у правінцыях Шаньдун, Хэнань і Хубэй і іншых раёнах Кітая з упорам на падтрымку работ, звязаных з унясеннем угнаенняў, абаронай усходаў, арашэннем і свідраваннем трубчастых калодзежаў.