У маі ў Кітаі былі зафіксаваны двухзначныя тэмпы росту вытворчасці і продажаў аўтамабіляў на новых крыніцах энергіі (NEV) у параўнанні з аналагічным перыядам мінулага года. Паводле даных Асацыяцыі аўтамабілебудаўнічай прамысловасці Кітая (CAAM ), вытворчасць NEV вырасла на 22,4 працэнта ў гадавым вылічэнні і перавысіла 1,5 мільёна машын, а продажы павялічыліся на 14,4 працэнта — да 1,49 мільёна адзінак, перадае «Сіньхуа».
У маі продажы NEV склалі 56,9 працэнта ад агульнага аб’ёму продажаў новых аўтамабіляў, што вышэй за паказчык папярэдняга месяца. У цэлым вытворчасць і продажы аўтамабіляў у маі павялічыліся ў месячным вылічэнні, дасягнуўшы 2,61 млн і 2,62 млн адзінак адпаведна. За першыя пяць месяцаў гэтага года агульны аб’ём вытворчасці і продажаў аўтамабіляў дасягнуў 12,23 млн і 12,2 млн машын адпаведна. Пры гэтым вытворчасць NEV склала 5,84 млн адзінак, а продажы — 5,8 млн адзінак, павялічыўшыся на 2,5 і 3,5 працэнта ў гадавым вылічэнні.
Галіновыя эксперты адзначаюць, што на ўнутраным рынку КНР назіраўся імклівы рост попыту на NEV на фоне больш слабых продажаў аўтамабіляў з рухавікамі ўнутранага згарання. Намеснік адказнага сакратара CAAM Чэнь Шыхуа звязвае гэту тэндэнцыю з высокімі цэнамі на нафту, якія павышаюць эксплуатацыйныя выдаткі традыцыйных аўтамабіляў і падкрэсліваюць эканамічную прывабнасць NEV. Ён дадаў, што значныя інвестыцыі кітайскіх аўтавытворцаў у інавацыі садзейнічалі хуткаму з’яўленню новых мадэляў электрамабіляў для задавальнення разнастайных патрэб спажыўцоў.
Экспарт аўтамабіляў працягвае імкліва расці. У маі Кітай экспартаваў 930 тыс. аўтамабіляў, што на 68,7 працэнта больш у гадавым вылічэнні, у тым ліку 446 тыс. NEV-аўто, што больш чым удвая перавышае паказчык гадавой даўнасці. За першыя пяць месяцаў экспарт аўтамабіляў перавысіў 4 млн адзінак, павялічыўшыся на 63 %. Пры гэтым экспарт NEV-аўто склаў 1,83 млн адзінак, гэта значыць таксама павялічыўся больш чым удвая.
Паспяховыя паказчыкі экспарту кітайскіх NEV-аўто на замежныя рынкі адлюстроўваюць мадэрнізацыю і ўзрослую комплексную канкурэнтаздольнасць аўтамабільнай прамысловасці Кітая, чаму садзейнічалі дзяржаўная палітыка і супрацоўніцтва паміж галінамі, адзначыў Чэнь Шыхуа. «У Кітаі сфарміраваўся паўнавартасны і эфектыўны ланцужок паставак для рынку NEV, які вызначаецца значным эфектам маштабу і высокай устойлівасцю да рызык, — сказаў Чэнь Шыхуа. — У той жа час такія інтэлектуальныя функцыі, як бартавыя інфармацыйна-забаўляльныя сістэмы, аўтаномнае кіраванне і інтэрактыўныя магчымасці салона, хутка развіваюцца, своечасова адаптуючыся да запатрабаванняў замежных карыстальнікаў і павышаючы канкурэнтаздольнасць прадукцыі».
Экспарт стаў асноўным рухавіком росту аўтамабільнага сектара Кітая ва ўмовах слабога ўнутранага спажывання на рынку ў цэлым. Кітайскія аўтавытворцы ўсё больш актыўна асвойваюць такія рынкі за мяжой, як Лацінская Амерыка і Еўропа. Гэта дапамагае кампенсаваць зніжэнне попыту на Блізкім Усходзе і падтрымлівае ўстойлівы рост аб’ёмаў экспарту аўтамабіляў, паведамілі ў Кітайскай асацыяцыі легкавых аўтамабіляў (СРСА).
Дзякуючы развітому ланцужку паставак і росту канкурэнтаздольнасці электрамабіляў у Кітаі аўтаэкспарт працягвае заставацца на высокім узроўні і ўсе катэгорыі мадэрнізуюцца, што падтрымлівае агульную стабільнасць галіны. У СРСА паведамілі, што імпульс для шырэйшага аднаўлення аўтамабільнага рынку Кітая ў чэрвені застанецца абмежаваным, чакаецца, што галіна захавае ўмераную тэндэнцыю да аднаўлення.
