Дзякуючы мяккаму клімату, багатай этнакультурнай спадчыне і развітой інфраструктуры для турызму, жыцця і вядзення бізнесу Хунхэ-Хані-Ійская аўтаномная акруга правінцыі Юньнань становіцца ўсё больш папулярным месцам для адпачынку і працяглага пражывання на паўднёвым захадзе Кітая, перадае «Жэньмінь жыбаа» анлайн».
У 2025 годзе Хунхэ наведалі 365,8 тысячы турыстаў, што на 75,3% больш у параўнанні з папярэднім годам. Па тэмпах росту турыстычнай галіны акруга ўвайшла ў лік лідараў правінцыі Юньнань. Канцэпцыя «Размеранае жыццё ў Хунхэ» стала вядомым культурным і турыстычным брэндам рэгіёна.
Размешчаны на тропіку Рака, Хунхэ-Хані-Ійская аўтаномная акруга адрозніваецца мяккім кліматам круглы год і гарманічна спалучае жывапісную прыроду з багатай культурнай спадчынай, гісторыя якой налічвае тысячы гадоў. Такія ўнікальныя славутасці, як рысавыя тэрасы Хунхэ-Хані, старажытны горад Цзяньшуй і знакамітая цзяньшуйская фіялетавая кераміка, робяць рэгіён прывабным для наведвання ў любую пару года. Дзякуючы гэтаму Хунхэ развіваецца не толькі як напрамак для экскурсійнага турызму, але і як месца для працяглага адпачынку і пражывання.
Выкарыстоўваючы перавагі розных раёнаў акругі, улады Хунхэ сфарміравалі разнастайную сістэму турыстычных і аздараўленчых прадуктаў. Горад Мілэ робіць стаўку на развіццё індустрыі аздараўлення на базе тэрмальных крыніц; Цзяньшуй прыцягвае турыстаў непаўторнай атмасферай старажытнага горада і традыцыямі вытворчасці фіялетавай керамікі; а Пінбянь-Мяоскі аўтаномны павет выкарыстоўвае багатыя рэсурсы некранутых трапічных лясоў і традыцыйнай медыцыны народнасці мяа для развіцця лясной рэкрэацыі, клімататэрапіі і аздараўленчых праграм на аснове зёлак.
Падарожжа па Хунхэ-Хані-Ійскай аўтаномнай акрузе — гэта не проста адпачынак, а магчымасць глыбей пазнаёміцца з мясцовай культурай і зрабіць унёсак у развіццё мясцовых супольнасцяў. Яскравым прыкладам служыць вёска Лунма. На фоне маляўнічых рысавых тэрас мясцовыя жыхары пераабсталявалі пустыя будынкі ў гасцявыя дамы і запусцілі арыгінальны праект «Запрашэнне ад старасты вёскі». У яго рамках вандроўцы могуць разам з вяскоўцамі высаджваць рысавую расаду на тэрасных палях і ўдзельнічаць у традыцыйных святочных застоллях пад адкрытым небам.
Такі фармат турызму, заснаваны на цесным узаемадзеянні з мясцовымі жыхарамі, дае магчымасць гасцям адчуць сябе часткай вясковага жыцця. У той жа час сельскія жыхары атрымліваюць дадатковыя крыніцы даходу: прадаюць вырашчаны на тэрасах чырвоны рыс і качыныя яйкі, а таксама знаёмяць аўдыторыю з культурай народа хані праз прамыя інтэрнэт-трансляцыі. Гэта садзейнічае захаванню культурнай спадчыны і фарміраванню ўстойлівай мадэлі развіцця турызму.
Прывабнасць Хунхэ-Хані-Ійскай аўтаномнай акругі вызначаецца не толькі яго маляўнічымі краявідамі, але і фарміраваннем спрыяльнага асяроддзя для так званых «лічбавых качэўнікаў». Усё больш маладых людзей выбіраюць рэгіён для жыцця і працы. У адказ на гэты попыт мясцовыя ўлады пераабсталююць пустыя будынкі ў сучасныя шматфункцыянальныя прасторы, якія аб’ядноўваюць жыллё, працоўныя зоны і грамадскія пляцоўкі. Дзякуючы гэтаму многія госці паступова перастаюць быць проста турыстамі і становяцца пастаяннымі жыхарамі рэгіёна.
Мікалай ЛІТВІНАЎ