Бяспека грамадзян — комплексная задача, якая патрабуе ўзгодненых намаганняў дзяржорганаў, грамадскіх арганізацый і асабістай адказнасці кожнага. Штогод на тэрыторыі нашай краіны адбываецца каля 6 тысяч пажараў. Таму для прафілактыкі НС у нашай краіне па добрай традыцыі праходзіць штогадовая рэспубліканская акцыя «За бяспеку разам», якая аб’ядноўвае розныя ведамствы для сумеснай работы: ад прафілактыкі пажараў і іншых НС да аказання дапамогі найбольш уразлівым катэгорыям насельніцтва. Аб мэтах і этапах правядзення гэтай акцыі, а таксама практычных выніках міжведамаснага ўзаемадзеяння ў ходзе тэматычнай прэс-канферэнцыі падрабязна расказалі запрошаныя эксперты.

Асаблівая ўвага дакладчыкаў была ўдзелена пытанням прафілактыкі бытавых пажараў, папярэджанню гібелі людзей на вадаёмах, кантролю за спажываннем энергарэсурсаў і забеспячэнню бяспечных умоў пражывання для сацыяльна неабароненых і адзінокіх грамадзян. 

Як адзначыў намеснік начальніка ўпраўлення арганізацыі нагляду і прафілактыкі галоўнага ўпраўлення нагляду і прафілактыкі МНС Дзяніс Жукоўскі, асноўная доля пажараў — каля 80 % і 95 % загінулых людзей — прыпадае менавіта на жыллёвы фонд. «Праведзены аналіз паказаў: штогод на працягу апошніх 5 гадоў асноўнай прычынай пажараў з’яўляецца неасцярожнае абыходжанне з агнём. Па гэтай прычыне адбываецца каля 40 % пажараў, — канкрэтызаваў ён. — Таксама найбольшая колькасць пажараў адбываецца з прычыны аварыйных рэжымаў работы электрасеткі, электраабсталявання і парушэння патрабаванняў пажарнай бяспекі пры эксплуатацыі ацяпляльных прыбораў (каля 25 % пажараў штогод)». 

З улікам паніжаных тэмператур, найбольш распаўсюджаная прычына пажараў сёлета — парушэнне патрабаванняў пажарнай бяспекі пры эксплуатацыі ацяпляльных прыбораў (каля 40 % пажараў). Акрамя таго, асноўнай прычынай гібелі людзей ад пажараў па-ранейшаму з’яўляецца неасцярожнае абыходжанне з агнём, а найбольшая колькасць загінулых знаходзіліся ў стане алкагольнага ап’янення. Дарэчы, у 2025 годзе па віне асоб, якія знаходзіліся ў стане алкагольнага ап’янення, загінула 273 чалавекі. Гэта больш за 50 % ад усіх загінулых ад пажараў людзей, паведаміў Дзяніс Жукоўскі.

«МНС праводзіцца сістэмная работа па фарміраванні ў грамадстве культуры і бяспекі жыццядзейнасці, каардынацыі дзейнасці зацікаўленых органаў у гэтай сферы. Пры гэтым вырашэнне праблемы гібелі людзей як ад пажараў, так і ад іншых знешніх прычын магчыма ў выпадку эфектыўнага ўзаемадзеяння паміж зацікаўленымі дзяржаўнымі органамі, — перакананы ратавальнік. — Таму ў мэтах папярэджання пажараў у жыллёвым фондзе ўжо традыцыйна з 7 па 15 сакавіка 2026 года на тэрыторыі нашай краіны будзе праводзіцца міжведамасная рэспубліканская прафілактычная акцыя „За бяспеку разам“. Гэта акцыя ў нас праводзіцца двойчы на год: у веснавы і восеньскі перыяды. Асноўная мэта і ідэя акцыі — акцэнтаваць увагу насельніцтва на неабходнасці выканання патрабаванняў бяспекі, а таксама аказаць неабходную дапамогу тым катэгорыям грамадзян, якія ў ёй маюць патрэбу». 

У рамках акцыі ратавальнікі правядуць ацэнку супрацьпажарнага стану домаўладанняў з выдачай адпаведных рэкамендацый, а таксама інструктажы аб мерах пажарнай бяспекі. Штогод у перыяд акцыі пажарна-прафілактычная работа праводзіцца ў парадку 50 тысяч домаўладанняў і кватэр грамадзян. Асаблівая ўвага, паводле слоў спецыяліста, будзе нададзена стану ацяпляльнага абсталявання, электраабсталявання, а таксама наяўнасці і спраўнасці аўтаномных пажарных апавяшчальнікаў. «Акрамя таго, у перыяд акцыі традыцыйна мы прапануем нашым грамадзянам самастойна звярнуцца да тэрытарыяльных органаў па надзвычайных сітуацыях для правядзення ацэнкі супрацьпажарнага стану іх домаўладанняў. Неабходна адзначыць, што дадзеная паслуга карыстаецца папулярнасцю сярод насельніцтва, і штогод у перыяд акцыі да нас звяртаюцца каля тысячы грамадзян. Ім аказваецца кваліфікаваная дапамога па пытаннях забеспячэння пажарнай бяспекі», — рэзюмаваў Дзяніс Жукоўскі.

Данііл ХМЯЛЬНІЦКІ