Толькі ў абсталяваных месцах

Сёлета ў краіне падрыхтавала каля 180 абсталяваных купеляў, на якіх будуць забяспечваць бяспеку каля 330 супрацоўнікаў АСВОД, МНС і МУС і хуткай медыцынскай дапамогі. У тым ліку шэсць купеляў будуць гатовы прыняць аматараў зімовага купання ў Мінску.

Як расказаў вадалазны спецыяліст цэнтра вадалазна-ратавальнай службы РАСП МНС Мікалай Васільеў, месцы для купання павінны адпавядаць санітарна-гігіенічным нормам, дно павінна быць плаўным, без уступаў глыбінёй ад 1,2 да 1,8 метра. Купелі спалучаюцца з берагам, надзейна замацаваным мосцікамі ці трапамі. Сходы ў ваду павінны быць зручнымі і мець поручні. Асноўны прыток людзей чакаецца ў ноч з 18 на 19 студзеня, таму ўстанаўліваюцца светлавыя прыборы, каб падыходы і сама купель былі асветленымі.

Паколькі сёлетняя зіма не адзначаецца мінусавымі тэмпературамі, таўшчыня лёду пакуль не больш за 3–5 см. Таму выхад на яго катэгарычна забаронены. Побач з выхадам з купелі будуць арганізаваны палаткі з ацяпляльнымі прыборамі і распранальні, дзе можна сагрэцца.

Як правільна акунуцца ў палонку?

Акунанне ў палонку раз на год не мае нічога агульнага з загартоўваннем, галоўная ўласцівасць якога — пастаянства, нагадвае загадчык 11-й падстанцыі гарадской станцыі хуткай медыцынскай дапамогі Яўген Юдакоў.

— Нават здаровыя людзі, якія не маюць супрацьпаказанняў да купання, усё роўна павінны падрыхтавацца да акунання: за некалькі тыдняў варта рабіць абліванні, пачынаючы з цёплай вады і штодзённа паніжаючы градус, — кажа ўрач.

Акунацца, тым больш скакаць у ваду з галавой, не рэкамендуецца. Варта заходзіць паступова, акунацца па шыю. Перад акунаннем трэба размяцца. Акунацца трэба не на галодны страўнік — лепш, калі ў арганізма будзе запас энергіі. Знаходзіцца ў вадзе не рэкамендуецца больш за некалькі хвілін. Пасля неабходна насуха выцерці цела, надзець цёплае сухое адзенне і сагрэцца ў цёплым памяшканні.

— Нягледзячы на тое, што тэмпература паветра прагназуецца плюсавай, вада будзе дастаткова халоднай — каля 2? С, а гэта стрэс для арганізма. І кожны павінен добра падумаць і ацаніць свой стан здароўя перад тым, як акунацца, — звяртае ўвагу Яўген Юдакоў.

Нельга акунацца ў ледзяную ваду людзям з вострымі захворваннямі ці абвастрэннямі хранічных хвароб, цяжарным жанчынам, дзецям да сямі гадоў (гэта звязана з недасканаласцю цепларэгуляцыі дзіцячага арганізма), людзям, старэйшым за 75 гадоў. Супрацьпаказаннямі з’яўляецца наяўнасць эпілепсіі, схільнасці да сутаргаў, цукровы дыябет, гіпертанія. 

З асцярожнасцю да акунання трэба падыходзіць людзям з хранічнымі сардэчна-сасудзістымі захворваннямі, хваробамі органаў дыхання, нырак, суставаў і іншых унутраных органаў.

У ТЭМУ

Як пазбегнуць пераахаладжэнняў і абмаражэнняў

Найчасцей абмаражэнню падвяргаюцца часткі цела, якія выступаюць: пальцы рук і ног, вушы і нос. Таму варта выкарыстоўваць шапку, шарф, пальчаткі, абавязкова насіць зручны няцесны абутак.

Алкагольнае ап’яненне абцяжарвае пераахаладжэнне. Напачатку яно дае ўяўнае адчуванне сагравання, затое потым пераахаладжэнне адбываецца хутчэй, чым у чалавека, які алкаголь не ўжываў.

Калі разумееце, што губляецца адчувальнасць у пальцах ці іншых частках цела, не трэба расціраць іх снегам — гэта можа прывесці да дадатковай траўматызацыі і так пашкоджанай скуры. Выкарыстоўваць для гэтых мэт спірт ці гарэлку таксама не рэкамендуецца, яны выклікаюць дадатковае цеплаадвядзенне ад тканак. Не трэба сагравацца і ў гарачай ванне: калі нейкая частка цела пераахаладзілася, саграваць неабходна паступова, пачынаючы з летняй вады, павялічваючы тэмпературу.

У мароз трэба абмежаваць сваё знаходжанне на вуліцы без крайняй неабходнасці і выбіраць правільнае адзенне. Не варта курыць, бо змяншаецца перыферычная цыркуляцыя крыві, тым самым арганізм больш адчувальны да холаду. Не рэкамендуецца насіць металічныя ўпрыгажэнні, бо метал адводзіць цяпло значна хутчэй.