Інцыдэнт адбыўся ў сакавіку бягучага года, жанчыну падчас прагулкі паранілі ў спіну. Прадстаўнікі арміі запэўнілі, што старанна расследуюць сітуацыю. «І вось жанчына атрымала паведамленне, што працэс спынены. Яна ў шоку», — адзначаецца ў публікацыі.

Спыненне справы матывавана тым, што параненай прычыненыя «лёгкія цялесныя пашкоджанні». «У ходзе крымінальнага працэсу ўстаноўлена, што цялесныя пашкоджанні пацярпелай, хутчэй за ўсё, звязаныя з ваеннымі вучэннямі, якія 4 сакавіка праходзілі на тэрыторыі ваеннага аб’екта ў Даўгаўгрыве каля пляжу Рытабулі. Расследаванне паказала, што куля была выпушчаная з вялікай адлегласці і ў палёце зачапіла нейкі іншы аб’ект, што паказвае на магчымы рыкашэт», — гаворыцца ў тэксце пісьмовага адказу арміі. 

Пацярпелая падкрэслівае, што дагэтуль не можа прыйсці ў сябе і наведвае псіхолага. Акрамя таго, жанчына звярнулася ў Латвійскі Фонд рызык лячэння з просьбай кампенсаваць фізічныя і маральныя пакуты. У пацярпелай, якая знаходзіцца ў перадпенсійным узросце, пасля таго, што здарылася, часта бываюць болі, ёй даводзіцца рэгулярна прымаць абязбольвальныя. 

«Я нічога не парушала. Я ішла да мора. І яны ні за што не адказваюць?» — задаецца пытаннем яна.

Куля, якую вынялі ў пацярпелай падчас аперацыі, была калібра 5,56 мм — такія боепрыпасы выкарыстоўваюцца ў штурмавых вінтоўках H&K G36, якія стаяць на ўзбраенні арміі. Аднак экспертыза прыйшла да высновы, што ўстанавіць канкрэтную вінтоўку, з якой быў зроблены стрэл, немагчыма. Дзве судова-медыцынскія экспертызы прызналі, што пацярпелай прычыненыя лёгкія цялесныя пашкоджанні.

Як патлумачыў адвакат жанчыны, рашэнне абскардзілі менавіта з-за супярэчлівых заключэнняў. Ступень цялесных пашкоджанняў не адпавядае рэальна атрыманым траўмам. Балістычная экспертыза праведзена павярхоўна.

«Не змаглі ўстанавіць, з якой менавіта зброі стралялі. Нам гэта здалося дзіўным, бо кожная зброя стаіць на ўліку, і па пулі, якую вынялі з цела маёй кліенткі, па-мойму, гэта можна вызначыць. Таксама не сказана, ці праводзілася экспертыза сістэмы відэаназірання», — указаў адвакат.

Цяпер пракуратура цягам месяца павінна паведаміць, ці будзе справа накіраваная на паўторны разгляд.