У мерапрыемстве прынялі ўдзел кіраўнікі органаў ваеннага кіравання, камандзіры і начальнікі штабоў злучэнняў і воінскіх часцей, іншыя службовыя асобы. На вучэбных пунктах яны азнаёміліся з парадкам навучання войскаў (сіл) выкананню задач пры падрыхтоўцы і ў ходзе вядзення баявых (спецыяльных) дзеянняў, асаблівасцямі падрыхтоўкі і вядзення аперацыі Узброеных Сіл па крызісным рэагаванні.

Службовым асобам даручана ўважліва вывучыць прапанаваныя падыходы да падрыхтоўкі войскаў і ўкараніць іх у практыку ў новым навучальным годзе. Упор — на ўкараненне ў баявую падрыхтоўку Узброеных Сіл вопыту сучасных узброеных канфліктаў.

На аператыўным зборы былі прадэманстраваны найноўшыя падыходы ў падрыхтоўцы войскаў. Сярод іх — навучанне асабовага складу супрацьдзеянню БЛА; эвакуацыя параненага з поля бою з задзейнічаннем рабатызаваных платформ і навучанне ваеннаслужачых аказанню першай дапамогі ў асаблівых умовах; падрыхтоўка асабовага складу да вядзення бою ў лесе з ужываннем малых тактычных груп, у тым ліку з выкарыстаннем мотатэхнікі; развіццё псіхалагічнай і фізічнай гатоўнасці асабовага складу на псіхалагічнай паласе перашкод; размініраванне з дапамогай рабатызаванай тэхнікі беларускай вытворчасці.

Падчас аператыўнага збору асаблівая ўвага — псіхалагічнай і фізічнай падрыхтоўцы. Ад гэтых важных фактараў напрамую залежыць здольнасць асабовага складу выконваць задачы ў складаных умовах.

«Мы вывучаем досвед вядзення баявых дзеянняў і выдатна разумеем, наколькі важная псіхалагічная гатоўнасць асабовага складу да дзеянняў ва ўмовах вядзення бою, якія хутка мяняюцца, — звярнуў увагу намеснік начальніка ўпраўлення галоўнага ўпраўлення баявой падрыхтоўкі Узброеных Сіл палкоўнік Андрэй ЖУК. — Кожны баец павінен упэўнена дзейнічаць, быць гатовым да таго, што ў адносінах да яго будуць уздзейнічаць рознага роду фактары, у тым ліку агнявое паражэнне, адэкватна рэагаваць у дадзенай сітуацыі, знаходзіцца ў гатоўнасці да аказання сама- і ўзаемадапамогі».

У ходзе практычнага этапу збору на палігоне прайшоў розыгрыш баявога эпізоду «Вядзенне баявых (спецыяльных) дзеянняў падраздзяленнямі, якія выконваюць задачы аўтаномна, у адрыве ад галоўных сіл». Падраздзяленні адпрацоўвалі наступныя пытанні: разведку з выкарыстаннем беспілотных лятальных апаратаў, дзеянні асабовага складу на пасту паветранага назірання, вядзенне бою на ўчастку мясцовасці, баявое прымяненне БЛА і процідзеянне беспілотнікам, а таксама дзеянні прызначаных агнявых сродкаў у раёнах збору незаконных узброеных фарміраванняў.

«Армія зробіць усё, каб захаваць мір і спакой грамадзян» 

Як адзначыў у размове з журналістамі міністр абароны Віктар ХРЭНІН, у любы навучальны год ступень, узровень і накіраванасць падрыхтоўкі Узброеных Сіл заўсёды залежыць ад абстаноўкі вакол Рэспублікі Беларусь. «На жаль, абстаноўка не становіцца лепшай, — канстатаваў ён. — Градус напружанасці ўсё роўна працягвае нарастаць. Мы гэта бачым па дзеяннях кіраўніцтва калектыўнага Захаду, па той шалёнай мілітарызацыі, павелічэнні аб’ёмаў фінансавання на ваенныя патрэбы, закупцы наступальнага ўзбраення, канцэнтрацыі, стварэнні новых падраздзяленняў, асабліва ў нашых суседзяў. Іх агрэсіўная рыторыка ў наш бок сведчыць аб тым, што мы, улічваючы гэтыя ўмовы, павінны адэкватна рэагаваць і рыхтаваць свае Узброеныя Сілы».

Адной з вырашаных задач, па словах кіраўніка абароннага ведамства, стала павышэнне баявога патэнцыялу за кошт павелічэння баявога кампанента войск. «Гэта перш за ўсё дасягнута за кошт аптымізацыі арганізацыйна-штатных мерапрыемстваў, шляхам стварэння новых, павелічэння існуючых падраздзяленняў, уключэння іх у склад аб’яднанняў і воінскіх часцей, аптымізацыі кіраўніцкага апарату, — удакладніў Віктар Хрэнін. — Вельмі шмат нам удалося зрабіць і дасягнуць у рамках павышэння аснашчэння нашых войскаў сучаснымі ўзорамі ўзбраення. Сёлета мы прынялі на ўзбраенне больш як 200 шматлікіх узораў узбраення, ваеннай і спецыяльнай тэхнікі. У цэлым ва Узброеныя Сілы за гэты год пастаўлена больш як 35 тысяч розных узораў тэхнікі і ваенна-тэхнічнай маёмасці». 

Сёлета ўдалося значна павысіць узровень укамплектаванасці Узброеных Сіл. «Можна ўжо смела сказаць, што ў нас няма праблем з прызыўным рэсурсам, — падкрэсліў міністр абароны. — Мы таксама бачым змяненне адносін нашай моладзі да праходжання ваеннай службы. Гэта работа над памылкамі, якая была праведзена за апошнія гады ў рамках ваенна-патрыятычнага выхавання».

Пэўныя поспехі дасягнуты і ў павышэнні ўкамплектаванасці афіцэрскіх кадраў. Эксперымент завяршыўся прызывам лейтэнантаў запасу пасля заканчэння ваенных кафедр. «Мы ўбачылі, што выбралі правільны шлях, таму цяпер ажыццяўляецца чарговы набор, — праінфармаваў Віктар Хрэнін. — Тым самым мы павышаем узровень падрыхтоўкі афіцэраў запасу, а таксама вырашаем задачу, якую нам ставіў Прэзідэнт, што ва Узброеных Сілах служыць павінны ўсе. Маладыя людзі, хто прыгодны, пройдуць службу, атрымаюць адпаведную ваенна-ўліковую спецыяльнасць».

Кіраўнік ваеннага ведамства адзначыў, што ўдалося дасягнуць высокіх паказчыкаў падрыхтоўкі ваенна-навучанага рэсурсу праз прызыў больш як 16 тысяч ваеннаабавязаных. Таксама быў павышаны ўзровень утрымання, абсталявання і рамонту тэхнікі. Шмат зроблена для павышэння і паляпшэння ўмоў утрымання ваенных гарадкоў, стварэння камфортных умоў для ваеннаслужачых.

«У пытаннях павышэння баявой падрыхтоўкі нашых ваеннаслужачых мы ўкаранілі новыя формы і спосабы прымянення войскаў, — праінфармаваў генерал-лейтэнант. — У цэлым я хачу сказаць, што ўзровень падрыхтоўкі Узброеных Сіл за мінулы навучальны год значна вырас. Мы дасягнулі пэўных мэт, якія ставілі перад сабой. Таксама хачу сказаць, што мы не збіраемся спыняцца на дасягнутым. Няма мяжы дасканаласці».

Віктар Хрэнін звярнуў увагу, што на дадзеным этапе штабы, органы кіравання вядуць работу над прыняццем новага плана абароны дзяржавы. «Сёлета завяршаем пяцігадовы цыкл у рамках будаўніцтва і развіцця Узброеных Сіл, — адзначыў ён. — Цяпер распрацоўваецца новы план на 2026—2030 гады. Мы ўлічваем абстаноўку, умовы і магчымасці нашай дзяржавы. Гэта ўсё будзе пакладзена ў падрыхтоўку Узброеных Сіл у новым навучальным годзе». 

У новым навучальным годзе беларуская армія будзе зыходзіць з актуальнай абстаноўкі. «На жаль, кіраўніцтва нашых суседзяў не хоча вырашаць праблемныя пытанні дыпламатычным шляхам, — канстатаваў міністр абароны. — Адным з асноўных фактараў стрымлівання іх ад прымянення ваеннай сілы будзе з’яўляцца гарантыя прымянення гэтай сілы з нашага боку. Ні ў каго не павінна быць сумнення, што ў нас для гэтага ўсё ёсць. Накіраванасць наступнага года будзе захоўваць прыкладна тыя тэмпы, якія мы набралі за апошнія гады. Асноўныя намаганні засяродзім на развіцці сістэм разведкі, радыёэлектроннай барацьбы, беспілотных авіяцыйных комплексаў, падсістэмы процідзеяння ім, контрбатарэйнай барацьбы, развіцці сістэм кіравання, укаранення новых форм і спосабаў у падрыхтоўку войскаў, на павышэнне ўзаемадзеяння і супрацоўніцтва з Расійскай Федэрацыяй і дружалюбнымі краінамі».

Віктар Хрэнін падкрэсліў, што армія зробіць усё, каб захаваць мір і спакой грамадзян. «Для гэтага мы павінны быць адным цэлым і адаптаванымі да новых умоў абстаноўкі, — удакладніў ён. — Менавіта таму наступны навучальны год ва Узброеных Сілах будзе вызначаны Годам баявога зладжвання».