Супрацоўнікі органаў унутраных спраў працягваюць працу па кантролі за правядзеннем уборачнай кампаніі. Іх асноўная задача — прадухіленне злачынных замахаў на таварна-матэрыяльныя каштоўнасці прадпрыемстваў аграпрамысловага комплексу. 

У прыватнасці, аператыўнікамі па барацьбе з эканамічнымі злачынствамі УУС Магілёўшчыны ў Шклоўскім раёне спынена злачынная дзейнасць загадчыка рамонтнай майстэрні і вадзіцеля сельскагаспадарчай арганізацыі, якія выкралі аўтазапчасткі і маторнае масла на агульную суму больш за 10 тысяч рублёў.

Па матэрыялах Калінкавіцкага РАУС распачата крымінальная справа ў дачыненні да трактарыста гаспадаркі, які на сістэмнай аснове краў дызельнае паліва.

«За дробны крадзеж да адміністрацыйнай адказнасці прыцягнуты 143 асобы, — адзначыў намеснік начальніка ўпраўлення ГУБЭЗ МУС Сяргей АЎСІЕВІЧ. — Выяўлена 86 выпадкаў незаконнага абарачэння гаруча-змазачных матэрыялаў, канфіскавана звыш 8 тон паліва. Устаноўлены 24 факты кіравання транспартам вадзіцелямі аграпрадпрыемстваў у стане ап’янення. Па выніках праверак захаванасці маёмасці мабільнымі групамі ўнесена звыш 650 прадстаўленняў аб устараненні прычын і ўмоў, якія садзейнічаюць учыненню правапарушэнняў, больш як сто з якіх датычацца разукамплектавання тэхнікі».

Сектар АПК знаходзіцца пад пільным кантролем міліцыі. Усім фактам супрацьпраўнай дзейнасці даецца прынцыповая ацэнка. Комплекс праверачных мерапрыемстваў працягваецца.

Вераніка КАНЮТА

Фота БелТА