Больш за ўсё жаніхоў і нявест — 35 пар — афіцыйна зарэгіструюць адносіны ў гэты дзень у абласным цэнтры: 18 — у загсе адміністрацыі Кастрычніцкага раёна Гродна, і 17 — у загсе адміністрацыі Ленінскага раёна. 

Сярод райцэнтраў вобласці больш за ўсё пар, якія жадаюць ажаніцца 26 чэрвеня, — у Лідзе. У горадзе афіцыйна з’явяцца 20 новых маладых сем’яў. Акрамя таго, у гэты дзень адна шлюбная пара з райцэнтра плануе ўрачыста адзначыць залаты юбілей — 50 гадоў сумеснага жыцця. Супрацоўнікі аддзела загс правядуць урачыстую цырымонію, дзе будуць традыцыйны абмен пярсцёнкамі, вясельны пацалунак, вясельны вальс, уручэнне дыплома залатых юбіляраў і занясенне імёнаў мужа і жонкі ў Ганаровую кнігу юбіляраў Лідчыны. 

Замыкае тройку самых «вясельных» гарадоў рэгіёна ў люстраную дату Смаргонь — тут заключаць шлюб 14 пар. 

Як растлумачыла начальнік галоўнага ўпраўлення юстыцыі аблвыканкама Алена Юргель, папулярнасць даты тлумачыцца не толькі яе люстранасцю. Хоць гэта мае значэнне: моладзь шукае для ўрачыстасці прыгожыя, запамінальныя лічбы, і традыцыйна колькасць ахвотных распісацца ў такія дні большая за звычайную. Акрамя таго, канец чэрвеня традыцыйна лічыцца камфортным часам для вяселляў: лета прыйшло, але яшчэ няма цяжкай ліпеньскай спякоты. 

Літаральна ў пачатку чэрвеня ў рэгіёне адзначаўся папярэдні такі наплыў маладых у загсы. У першыя летнія выхадныя, 6.06.26, на Гродзеншчыне зарэгістравалі шлюб 93 пары. Рэкорд устанавілі ў Гродне: тут 6 чэрвеня сталі мужам і жонкай 30 пар. Як лічаць спецыялісты, прычынай паслужыла не толькі люстраная дата, але і тое, што ў гэты дзень у горадзе праходзілі заключныя мерапрыемствы Рэспубліканскага фестывалю нацыянальных культур. Жаніцца ў дзень фестывалю ў Гродне ўжо стала лічыцца добрай прыкметай.