Пракуратура горада Магілёва па выніках праверкі выканання заканадаўства аб увекавечанні памяці аб загінулых пры абароне Айчыны і захаванні памяці аб ахвярах войнаў запатрабавала ліквідаваць парушэнні ў частцы ўліку і добраўпарадкавання воінскіх пахаванняў. Аб гэтым паведамляе БелТА.
«Пракуроры ўстанавілі неадпаведнасць звестак у пашпартах пахаванняў аб колькасці і імёнах загінулых тым даным, якія былі нанесены на надмагільныя збудаванні і занесены ў аўтаматызаваны банк даных «Кніга памяці Рэспублікі Беларусь», — адзначылі ў ведамстве.
Так, аналіз першасных звестак у дачыненні да аднаго з воінскіх пахаванняў паказаў, што інфармацыя як мінімум аб 60 загінулых адсутнічала на надмагільным збудаванні, у аўтаматызаваным банку даных і пашпарце воінскага пахавання.
Увагу пракурораў прыцягнуў і нездавальняючы стан некаторых мемарыялаў. Каля аднаго з іх не прыбіралі паваленыя дрэвы пасля буралому, а на тэрыторыі другога невядомыя ўстанавілі надмагілле, якое не мае дачынення да воінскага пахавання. На шэрагу аб’ектаў адсутнічалі таблічкі з назвай мемарыяла або ўказаннем органа мясцовай улады, адказнага за яго ўтрыманне. Таксама зафіксаваны неадпаведнасці паміж фатаграфіямі помнікаў у пашпартах і іх рэальным знешнім выглядам.
Па выніках праверкі пракурор Магілёва ўнёс прадстаўленне намесніку старшыні гарвыканкама з патрабаваннем устараніць недахопы і не дапускаць такіх сітуацый у будучыні. Выкананне акта нагляду ўзята на кантроль.
