Малдова — парламенцкая рэспубліка. Аднапалатны парламент з’яўляецца вышэйшым прадстаўнічым і заканадаўчым органам краіны і складаецца са 101 дэпутата. Ён ажыццяўляе кантроль за дзейнасцю выканаўчай улады, прымае дзяржаўны бюджэт, ратыфікуе, прыпыняе або дэнансуе міжнародныя дагаворы, прымае законы і пастановы, прызначае рэферэндумы, аб’яўляе мабілізацыю і ваеннае становішча і інш. Акрамя таго, дэпутаты выказваюць вотум даверу кандыдату ў прэм’ер-міністры, прапанаванаму прэзідэнтам пасля кансультацый з парламенцкімі фракцыямі.