Добраўпарадкаванне ўключае вялікі пералік работ — ад прыборкі да рамонту і азелянення.

— Штогод вызначаем прыкладна чвэрць двароў, якія прыводзім у парадак больш старанна. Так, у 2026 годзе добраўпарадкавана 88 тэрыторый. Яшчэ 11 — комплексна, фактычна пад ключ. Работы ўключаюць рамонт праездаў і пешаходных дарожак, стварэнне парковачных месц, абнаўленне асвятлення, пашырэнне зон азелянення, добраўпарадкаванне сучасных дзіцячых і спартыўных пляцовак. Размова аб дварах дамоў, у якіх быў завершаны капрамонт. Неўзабаве пасля яго абавязкова праводзіцца рамонт пад’ездаў. Пераўтварэнне прылеглай прасторы — заключны этап стварэння камфортнага асяроддзя, — удакладніла дырэктар прадпрыемства.

Па словах Надзеі Казунка, большасць даведзеных гадавых паказчыкаў перавыкананы. У прыватнасці, адрамантавалі і афарбавалі 650 адзінак дзіцячага абсталявання і 1077 малых архітэктурных формаў, замянілі 226 і 1324 адпаведна. Устанавілі 31 гульнявы комплекс і 14 спартыўных элементаў. Таксама двары папоўніліся 96 модульнымі канструкцыямі для збору адходаў (МКЗА). Акрамя таго, выкананы рамонт праездаў, у тым ліку поўная замена пакрыцця, на плошчы звыш 60 тыс. кв. м.

Да канца года дваровыя тэрыторыі ўпрыгожаць 1 тыс. дрэў і 6 тыс. кустоў, у тым ліку ў рамках праекта «Зялёны двор разам». Не менш за 50% з іх высаджаны вясной. Цяпер працягваюцца работы з удзелам жыхароў.

Надзея Казунка расказала пра грамадзянскія ініцыятывы:

— Адна з іх рэалізавана ў двары дома № 19, корп. 1 на пр. Любімава. Тут устанавілі сем адзінак дзіцячага абсталявання: карусель, арэлі, дзве пясочніцы (адна — у выглядзе карабліка), скрыню для цацак, гульнявы комплекс. Яшчэ адну грамадзянскую ініцыятыву маюць намер увасобіць у двары дома № 30 на вул. Я. Брыля. Нагадаю: у выпадку адабрэння заяўкі ў Мінгарсавеце жыхары ўносяць 10% сродкаў ад кошту праекта, астатняе пакрываецца з бюджэту.