У экспазіцыі выставы задзейнічана больш за 100 прадметаў з фондаў музея, якія адлюстроўваюць самабытныя асаблівасці рэгіёна. Узрост экспанатаў розны, ёсць нават асобнікі першай трэці дваццатага стагоддзя. Асаблівае месца нададзена працам па самабытным беларускім рамястве — саломапляценні — народнага майстра Беларусі Веры Гаўрылюк.

На выставе наведвальнікі могуць пазнаёміцца з традыцыйнымі касцюмамі Дамачэўскага ладу, ручнікамі з карункавымі ўстаўкамі, посцілкамі, прадметамі побыту, дэкаратыўна-прыкладнога мастацтва і фотаздымкамі, якія адлюстроўваюць эпоху пачатку ХХ стагоддзя.

«Наступная выстава будзе завяршальнай у серыі „Брэстчына этнаграфічная“, яна адлюструе ўсю прыгажосць Брэсцкай вобласці», — падзялілася старшы навуковы супрацоўнік Брэсцкага абласнога краязнаўчага музея Ганна Дабравольская.

Азнаёміцца з экспазіцыяй можна да 10 мая.