Тут размешчана сучасная спартыўная арэна вышэйшай катэгорыі, што дае магчымасць мазыранам прымаць спаборніцтвы міжнароднага ўзроўню. Унікальнасць арэны не толькі ва ўніверсальнасці, але і ў архітэктуры: трыбуны на 400 месцаў з чатырох бакоў. У краіне падобныя пляцоўкі можна літаральна пералічыць па пальцах.

— З моманту адкрыцця «Палессе-Арэна» ўжо прыняла рэспубліканскі турнір па каратэ з удзелам больш як 500 спартсменаў, маштабнае спартыўнае шоу — «Фінал чатырох» Кубка Беларусі — 2025 па гандболе сярод мужчынскіх і жаночых каманд, а таксама міжнародны турнір па міні-футболе сярод упраўленняў Следчага камітэта з удзелам каманд з Расійскай Федэрацыі. Уражанні ў гасцей засталіся самыя яркія. Яны адзначалі, што ўзровень арганізацыі не саступае сталічнаму, — падкрэслівае дырэктар фізкультурна-аздараўленчага цэнтра «Палессе-Арэна» Аляксандр Шкоркін (на фота).

Новы цэнтр забяспечыў яшчэ большае развіццё масавага спорту на Мазыршчыне. Напрыклад, у рамках праекта «Спорт для ўсіх» на базе ўстановы займаюцца дзеці, якія не з’яўляюцца выхаванцамі СДЮШАР. Каманды горада ўжо прадстаўлялі раён на абласных і рэспубліканскіх этапах. Тут прайшло свята фізічнай культуры для ўсіх узростаў — маштабная спартакіяда (звыш 20 відаў спорту) сярод работнікаў прадпрыемстваў і арганізацый, навучэнцаў каледжаў і ВНУ, прадстаўнікоў аграпрамысловага комплексу Мазырскага раёна.

Увогуле спартыўны аб’ект Мазыршчыны жыве вельмі насычаным жыццём: ад масавых мерапрыемстваў да трэніровак прафесіяналаў. У другім блоку цэнтра, які функцыянуе ўжо шэсць гадоў, трэніруюцца выхаванцы СДЮШАР «Жамчужына Палесся» па валейболе, займаюцца юныя футбалісты клуба «Славія-Мазыр».

— Усяго ў Мазыры дзейнічае пяць спартыўных школ. Адна з іх — найбуйнейшая ў Гомельскай вобласці — уключае восем аддзяленняў: гульнявыя віды спорту, лёгкую і цяжкую атлетыку, плаванне, адзінаборствы. Таму, безумоўна, адзін з прыярытэтных кірункаў нашага раёна — далейшае развіццё і ўмацаванне дзіцяча-юнацкага спорту.

У цэнтры «Палессе-Арэна» трэніруюцца вучні спартыўных класаў, юныя выхаванцы ДЮСШ, — звяртае ўвагу начальнік аддзела спорту і турызму Мазырскага райвыканкама Галіна Касцяшкіна (на фота). — Задача профільных цэнтраў і школ — не толькі пошук і падрыхтоўка прафесіяналаў, але і стварэнне ўмоў для ўсіх тых, хто жадае займацца спортам. Таму залы запоўнены круглы год, а спартыўная база штогод удасканальваецца і мадэрнізуецца пры падтрымцы мясцовай улады, — падкрэслівае начальнік аддзела.

Дарэчы, у другім блоку ўстановы дзейнічае фізкультурна-аздараўленчы цэнтр з саўнай і басейнам, трэнажорнай залай, фітнес-заламі, залай харэаграфіі. Праводзяцца заняткі з насельніцтвам па аквааэробіцы, фітнесе, шахматах, стрытболе. Трэнеры працуюць як з дзецьмі, так і з дарослымі. Аздараўленчы цэнтр актыўна супрацоўнічае і з прафсаюзнымі арганізацыямі працоўных калектываў. Дзякуючы гэтаму ў жыхароў Мазыра ёсць магчымасць атрымліваць якасныя паслугі ў сферы фізічнай культуры.

У «Палессе-Арэне» не забываюць і пра ветэранаў спорту. Былыя прафесійныя спартсмены, якія завяршылі кар’еру, знаходзяць тут магчымасць заставацца актыўнымі, працягваць трэніроўкі. Гэта не проста падтрымка фізічнай формы, а падаўжэнне маладосці і прыклад для моладзі.

У цэнтры кажуць, што яны не ставяць сабе адзнак — пра іх гавораць самі людзі, якія вяртаюцца ў «Палессе-Арэну» зноў і зноў. А гэта — найлепшая ўзнагарода за працу.

Фота Алены ДАЎЖАНОК