Ва ўніверсітэты Беларусі ў гэтым годзе плануецца прыняць 6,3 тыс. мэтавікоў. «Лічба гэта ўжо зацверджана. Інфармацыя ўся размешчана на сайце Мінадукацыі, на сайтах устаноў вышэйшай адукацыі ў разрэзе спецыяльнасцяў, у разрэзе заказчыкаў кадраў. І сёння актыўна нашы абітурыенты і іх бацькі ўжо займаюцца якраз з ВНУ і з нашымі арганізацыямі — заказчыкамі кадраў у частцы заключэння дагавораў па мэтавай падрыхтоўцы», — расказаў Сяргей Пішчоў.

Калі параўноўваць з мінулым годам, то лічба супастаўная. «Летась у нас была колькасць месцаў мэтавых зацверджана 6,6 тыс., а залічана ў канчатковым выніку каля 6 тыс. мэтавікоў, калі дакладна — 5,9 тыс. студэнтаў-мэтавікоў. Таксама мяркуем, што ў гэтым годзе, з улікам той колькасці месцаў, якая зацверджана, паказчыкі будуць падобнымі», — заўважыў ён.

Сёлета ёсць некаторыя асаблівасці мэтавага прыёму, якія закранулі ў асноўным заказчыкаў кадраў. «Пры зацвярджэнні мэтавых месцаў улічвалася меркаванне нашых мясцовых органаў улады, аблвыканкамаў і Мінгарвыканкама ў частцы наяўнасці хадайніцтва для арганізацыі з улікам іх укладу ў развіццё рэгіёна. Мэтавая падрыхтоўка або мэтавае месца ў першую чаргу — гэта месца для нашай эканомікі і сацыяльнай сферы. Гэта не льготная траекторыя, гэта дадатковая магчымасць і адказны крок нашых арганізацый — заказчыкаў кадраў і абітурыентаў, якія, заключаючы дагавор, прымаюць на сябе не толькі правы і магчымасць асобнага тэрміну паступлення ва ўніверсітэт і гэтак далей, але і абавязкі, у першую чаргу — быць працаўладкаваным на гэта прадпрыемства. А другое — у працэсе навучання працаваць у рамках курсавога праектавання, у рамках практык вытворчых, пераддыпломных і дыпломнага праектавання непасрэдна ўжо са сваімі выкладчыкамі», — растлумачыў Сяргей Пішчоў.

Асноўная мэта мэтавай падрыхтоўкі — узмацніць практыкаарыентаванасць адукацыйнага працэсу, знізіць час на адаптацыю маладога спецыяліста ў будучыні на першым рабочым месцы. «Уся вось гэта работа праводзіцца непасрэдна ў час навучання. Прыходзячы пасля накіравання на першае рабочае месца, выпускнік, малады спецыяліст, ужо ўцягнуты ў тыя працэсы, у тыя пытанні, у тыя задачы, якія будуць перад ім стаяць», — падкрэсліў ён.

Што паказвае аналітыка па замацаванасці? «Яны ідуць на гэтыя рабочыя месцы, па дагаворы яны абавязаны прыйсці на гэта рабочае месца. Таму тут тыя адзінкавыя выпадкі адмовы і выплаты ў далейшым сродкаў, затрачаных на іх навучанне, паказваюць: сапраўды моладзь гэты крок разам са сваімі бацькамі робіць усвядомлена, паступаючы ва ўніверсітэты на мэтавую падрыхтоўку», — сказаў начальнік галоўнага ўпраўлення.