Да ўдзелу запрашаюцца члены прафсаюзаў, гатовыя прапанаваць практыкаарыентаваныя рашэнні, накіраваныя на развіццё розных сфер жыцця людзей. Праекты распрацоўваюцца для рэалізацыі на тэрыторыі Мінскай вобласці і прымаюцца па трох намінацыях.

Першая намінацыя аб’ядноўвае ініцыятывы ў сферы сацыяльна-працоўных адносін: абарону правоў работнікаў, павышэнне ўзроўню і якасці жыцця, удасканаленне якасці прадукцыі і паслуг. Таксама ў фокусе — мадэрнізацыя вытворчасці, укараненне інавацый, развіццё сацыяльнага партнёрства, удасканаленне калектыўных дагавораў і ўмоў працы.

У другой намінацыі разглядаюцца праекты, накіраваныя на развіццё міжнароднага супрацоўніцтва, патрыятычнае і духоўна-маральнае выхаванне моладзі, захаванне гістарычнай памяці і падтрымку старэйшага пакалення. Таксама вітаюцца ініцыятывы па развіцці прафарыентацыі, папулярызацыі прафесійнай адукацыі, умацаванні прафсаюзнага руху, прасоўванні здаровага ладу жыцця, добраўпарадкаванні тэрыторый і развіцці турыстычнага патэнцыялу рэгіёна.

Трэцяя намінацыя прысвечана праектам, накіраваным на ўмацаванне інстытута сям’і, павышэнне ролі жанчын у грамадстве і ўмацаванне традыцыйных маральных каштоўнасцяў.

Заяўкі на ўдзел у конкурсе прымаюцца да 31 кастрычніка 2026 года. Пасля папярэдняга адбору аўтары найлепшых праектаў атрымаюць запрашэнне прадставіць свае ініцыятывы ў фармаце прэзентацыі. Конкурсная камісія вызначыць найлепшых у кожнай намінацыі (першае, другое і трэцяе месцы). Аўтары праектаў будуць узнагароджаны сертыфікатамі прафсаюзных актывістаў і грашовымі прэміямі.

— Конкурс — важны інструмент падтрымкі ініцыятыў, якія знаходзяць практычнае прымяненне і прыносяць рэальную карысць людзям і Мінскаму рэгіёну. Для нас, для прафсаюзаў, гэта не проста конкурс, а магчымасць пачуць новыя, свежыя ідэі, убачыць нестандартныя падыходы і, самае галоўнае, дапамагчы ў іх рэалізацыі. Асобна адзначу, што значную частку прапаноў уносяць маладыя людзі. Гэта сведчыць аб высокай уцягнутасці моладзі ў прафсаюзны рух, іх зацікаўленасці ў развіцці сваёй прафесіі, прадпрыемстваў і рэгіёна ў цэлым, — адзначыла прадстаўнік Мінскага абласнога аб’яднання прафсаюзаў Таццяна Гур’ева.

Трэба адзначыць, што конкурс праводзіцца штогод і ўжо зарэкамендаваў сябе як эфектыўная пляцоўка для падтрымкі ініцыятыўных работнікаў. За некалькі гадоў яго правядзення дзясяткі ідэй атрымалі развіццё і былі паспяхова рэалізаваны на практыцы. Напрыклад, сярод пераможцаў мінулых гадоў — праект «Настаўніцтва — важны вектар у сістэме адукацыі», які дапамагае маладым педагогам хутчэй адаптавацца не толькі ў прафесіі, але і ў працоўным калектыве.

Яшчэ адзін прыклад — праект «PROF_Марафон», які рэалізуецца работнікам з Маладзечна. Ініцыятыва накіравана на пашырэнне інфармаванасці аб разнастайнасці прафесій і асаблівасцях рэгіянальнага рынку працы, дапамагае моладзі зарыентавацца і зрабіць усвядомлены прафесійны выбар.

Падрабязней аб удзеле ў конкурсе можна азнаёміцца на сайце Мінскага абласнога аб’яднання прафсаюзаў.

Алена КРАВЕЦ