У Мінскую абласную арганізацыю Беларускага прафсаюза работнікаў ЖКГ і сферы абслугоўвання звярнуўся работнік арганізацыі сферы бытавога абслугоўвання Мінскай вобласці з просьбай аказаць прававую дапамогу ў частцы адмены дысцыплінарнага спагнання ў выглядзе вымовы, якая, на яго думку, была ўжытая неабгрунтавана.

Для вывучэння сітуацыі прававы інспектар працы Мінскай абласной арганізацыі галіновага прафзвязу Марына Церашкова правяла маніторынг выканання заканадаўства аб працы непасрэдна ў арганізацыі. «Як высветлілася, прычынай канфлікту стала рабочая сітуацыя. Падчас аказання паслугі цырульнік даў кліенту прафесійныя рэкамендацыі па догляду за скурай галавы і валасамі. Аднак парады спецыяліста выклікалі незадаволенасць наведвальніка, пасля чаго скарга паступіла наймальніку. У выніку работніку была абвешчаная вымова за парушэнне правілаў унутранага працоўнага распарадку пры зносінах з кліентамі», — расказалі ў прэс-службе.

«Падчас маніторынгу прафсаюзны юрыст устанавіла шэраг важных абставінаў. У арганізацыі дзейнічалі правілы ўнутранага працоўнага распарадку, якія ўтрымлівалі дадатковыя абмежаванні ў частцы зносін работнікаў з кліентамі і адрозніваліся ад тыпавога дакумента. Пры гэтым наймальнік не змог пацвердзіць факт азнаямлення работніка з названымі патрабаваннямі пад подпіс, што з’яўляецца парушэннем працоўнага заканадаўства», — адзначылі ў ФПБ.

Па выніках маніторынгу прафсаюз выдаў наймальніку рэкамендацыю аб ліквідацыі выяўленых парушэнняў. Аргументы прававога інспектара былі прыняты пад увагу, і загад аб прыцягненні работніка да дысцыплінарнай адказнасці быў адменены.