Сяўба яравых культур у сельгасарганізацыях Любанскага раёна запланавана на плошчы 26,2 тыс. га, з іх пад раннія збожжавыя і зернебабовыя культуры адведзена 2,5 тыс. га.

«Таксама на плошчы 19 тыс. га будзе пасеяна кукуруза, больш за 820 га зоймуць цукровыя буракі, 500 га — лён-даўгунец», — расказала першы намеснік старшыні Любанскага райвыканкама, начальнік упраўлення па сельскай гаспадарцы і харчаванні Жанна Алішэвіч.

Першай гаспадаркай, якая пачала сяўбу не толькі ў Любанскім раёне, але і на тэрыторыі Мінскай вобласці ў цэлым, стала ААТ «Забалоцкі». 

«Выходзяць сельгасарганізацыі на сяўбу яравога ячменю. Усяго ў гаспадарцы пад гэту культуру адведзена 300 га, на якіх у поўным аб’ёме праведзена перадпасяўная падрыхтоўка, уключаючы ўнясенне мінеральных угнаенняў», — адзначыла начальнік упраўлення.

Старт вясновым палявым работам дадзены ва ўсіх гаспадарках Любанскага раёна: вядзецца ўнясенне ўгнаенняў пад азімыя збожжавыя, азімага рапсу, шматгадовых траў, а таксама падрыхтоўка глебы пад азімую сяўбу. 

«У выкананні палявых работ задзейнічана больш як 60 адзінак энерганасычаных трактароў, на ўнясенні ўгнаенняў працуюць 10 сельгасмашын «Раса», — расказала Жанна Алішэвіч. 

З заўтрашняга дня сяўбу ранніх яравых збожжавых культур у Любанскім раёне пачнуць яшчэ пяць гаспадарак.

«У раёне ў механізатараў перагледжаны працоўны графік, каб яны маглі як мага раней выйсці ў поле і працаваць увесь светлавы дзень. Для тых, хто ўдзельнічае ў пасяўной, традыцыйна арганізавана гарачае харчаванне», — адзначыла Жанна Алішэвіч.