У суботу пры ўдзеле Старшыні Савета Рэспублікі, упаўнаважанага прадстаўніка кіраўніка дзяржавы ў горадзе Мінску Наталлі Качанавай, старшыні Мінскага гарвыканкама Уладзіміра Кухарава, міністра ўнутраных спраў Івана Кубракова, памочніка Прэзідэнта — інспектара па г. Мінску Дзмітрыя Равуцкага, кіраўнікоў адміністрацый раёнаў сталіцы быў праведзены аб’езд тых зон адпачынку, якія былі добраўпарадкаваны да Дня Незалежнасці. 

Фрунзенскі раён — «Вярба»

Канцэпцыя гэтай зоны адпачынку, што па вуліцы Пятра Глебкі, накіравана на захаванне прыроднага патэнцыялу тэрыторыі і фарміраванне грамадскай прасторы, заснаванай на вобразе вярбы.

У межах рэалізацыі канцэпцыі выканана дадатковае азеляненне: высаджана 16 вербаў і 89 клёнаў. Увосень тут прадугледжана яшчэ ўстаноўка лабірынта са стрыжаных кустоў, які стане новым элементам добраўпарадкавання і дзіцячай рэкрэацыі.

Планіровачная структура тэрыторыі пабудавана на развіцці існуючай сеткі пешаходных сувязяў. Выканана ўладкаванне новых дарожак да альтанак, а таксама створана дадатковае пешаходнае злучэнне паміж двума асноўнымі транзітнымі маршрутамі. Гэта дазволіла павысіць зручнасць перамяшчэння і звязаць функцыянальныя зоны ў адзіную сістэму.

Для стварэння камфортнай інфраструктуры адпачынку на тэрыторыі ўстаноўлены альтанкі, лежакі, лаўкі, сметніцы, велапаркоўка і крытая пляцоўка для збору адходаў. 

Для фарміравання бяспечнага асяроддзя абсталяваны чатыры інфармацыйныя стэнды з правіламі выгулу сабак і стойкі з пакетамі для прыборкі за жывёламі. На асноўных уваходах размешчаны інфармацыйныя стэлы, якія фарміруюць вядомы вобраз зоны адпачынку.

Асаблівая ўвага нададзена развіццю інфраструктуры для дзяцей, якая складаецца з пляцоўкі з пясочнай адсыпкай, дзіцячага гульнявога комплексу, арэляў, пясочніцаў, каруселяў, балансіраў... 

Для заняткаў спортам на тэрыторыі размешчана пляцоўка з атлетычным комплексам, у які ўваходзяць брусы, шведскія сценкі, турнікі, рукаходы і лавы.

Дырэктар камунальнага ўнітарнага прадпрыемства «Зелянбуд Фрунзенскага раёна» Алеся Савіч распавяла, што жыхары раёна звярталіся з просьбай стварыць тэрыторыю для адпачынку ў сваім раёне. «Раён ужо даўно ўсталяваўся, людзі тут пражываюць рознага ўзросту, і яны хацелі таксама мець каля сябе такую тэрыторыю, дзе яны б маглі пагуляць, адпачыць, хтосьці з дзецьмі, хтосьці проста пасядзець, атрымаць асалоду ад прыроды. Таму было прынята рашэнне, што на дадзенай тэрыторыі будзе створаная такая зона. Прыйшла ідэя зрабіць яе ў эка-стылі. Былі высаджаны, калі вы звярталі ўвагу, агароджы з лазы. Паставілі дзіцячае гульнявое абсталяванне, падзялілі пляцоўку на дзве лакацыі: для маленькіх і для дзяцей старэйшага ўзросту. Таксама людзі сёння вельмі моцна захапляюцца спортам і хочуць мець магчымасць дзесьці выйсці каля дома патрэніравацца, для гэтага ўстанавілі спартыўны комплекс. Паставілі альтанкі, каб бабулі і дзядулі мелі магчымасць спакойна атрымаць асалоду ад надвор’я і пагутарыць адно з адным».

Жыхарка Фрунзенскага раёна сталіцы, шматдзетная мама Ілона Гарбачэўская вельмі рада, што з’явілася добраўпарадкаванае месца побач з домам, дзе можна якасна правесці час з сынамі, якіх у яе трое — 14-гадовы Цімур, 6-гадовы Гардзей і маленькі Дамір.

«Жывём тут праз дарогу, гуляем двойчы на дзень. І мне вельмі падабаецца гэтая пляцоўка тым, што людзі розных узростаў могуць тут знайсці сабе занятак. Старэйшы сын дзесьці там — на брусах, сярэдні лазіць па канаце, малодшы на каруселях або ў пясочніцы», — дзеліцца жанчына.

Маскоўскі раён — «Сад вершаў» 

Ідэя акультурыць гэтую тэрыторыю прыйшла мінчаніну Уладзіславу Кашкоўскаму, які за праект «Сад Вершаў» атрымаў гран-пры праекта «Мінская змена — 2024».

У бягучым годзе ў межах рэалізацыі 2-й чаргі выкананы работы па ўладкаванні тут пешаходных дарожак з пакрыццём з дробнаштучнай пліткі, рамонт газона, устаноўлены лаўкі, асвятляльныя мачты з аўтаномнай сістэмай асвятлення на сонечных батарэях, стэнды з урыўкамі з твораў беларускіх паэтаў, мангальныя зоны з альтанкамі, інклюзіўнае абсталяванне для дзяцей з абмежаванымі магчымасцямі, а таксама зона для назірання за птушкамі, на якой устаноўлена кармушка, паілкі і стэнды з інфармацыяй пра насельнікаў экасцежкі.

Ленінскі раён — «Усё пачынаецца з любові» 

На гэтай тэрыторыі былі выкананы работы па санітарным абразанні дрэў, высечцы парасніку, прыборцы і добраўпарадкаванні тэрыторыі, устаноўцы зборных пакрыццяў з тратуарнай пліткі, а таксама па ўстаноўцы пакрыццяў з адсеву. Знайшлося месца і для малых архітэктурных формаў — аб’ёмнага сэрца і «Лавы кахання».

Заводскі раён — экалагічная сцежка «Парк тэхнічнай творчасці»

Яна задумана і рэалізавана ў адпаведнасці з канцэпцыяй, прапанаванай канкурсантамі праекта «Мінская змена — 2025». Размешчаная на тэрыторыі Сляпянскай воднай сістэмы, яе працягласць складае 500 метраў.

Тут ёсць усё неабходнае для адпачынку ўсёй сям’ёй: дзіцячае гульнявое абсталяванне, лаўкі з навесамі, спартыўнае абсталяванне. Выкананы работы па ўстаноўцы розных дэкаратыўных малых архітэктурных формаў, сустракае наведвальнікаў уваходная група.

Партызанскі раён — «Парк медыцыны»

Гэта зона адпачынку была таксама рэалізавана ў адпаведнасці з канцэпцыяй, прапанаванай канкурсантамі праекта «Мінская змена — 2025».

У ходзе яе стварэння быў выкананы рамонт пешаходных сувязяў, лесвіцы, добраўпарадкавана азелянёная тэрыторыя, устаноўлены 10 спартыўных трэнажораў, гульнявы і воркаут комплексы, інфармацыйныя стэнды на медыцынскую тэматыку, інсталяцыя «Гняздо бусла». Уздоўж пешаходнай дарожкі ўстаноўлены 23 лаўкі ўдзельнікаў агляд-конкурсу «Лепшая лаўка-2026».

Першамайскі раён — экасцежка «Лясная»

Добраўпарадкаваная тэрыторыя прызначана для актыўнага адпачынку, правядзення асветніцкіх і фізкультурна-аздараўленчых мерапрыемстваў, а таксама для спакойнага рэкрэацыйнага баўлення часу грамадзян.

Для забеспячэння камфорту наведвальнікаў ўстаноўлена 40 лавак, 40 сметніц, 6 арэляў, абсталявана ўваходная група, зманціравана 11 інфармацыйных стэндаў і 8 навігацыйных паказальнікаў.

Спецыялізаваныя зоны тут таксама ёсць: спартыўная пляцоўка, пляцоўка для правядзення заняткаў на адкрытым паветры, гульнявая зона, пляцоўка для ціхага адпачынку, месца калектыўнага адпачынку, маршрут скандынаўскай хады, дзіцячы гарадок, пляцоўка для выгулу хатніх гадаванцаў. А архітэктурна-мастацкае афармленне дапоўнена рознымі скульптурамі.

Савецкі раён — «Шлях да шчасця»

Ідэя канцэпцыі гэтай зоны адпачынку — стылістыка вяселля.

Пры ўваходзе размешчана кампазіцыя з назвай «Шлях да шчасця», таксама на тэрыторыі ўстаноўлены тры вясельныя аркі, якія выкананы з рознымі ўзорамі, кожная з якіх нясе свой сэнс: першая сімвалізуе знаёмства, другая — зараджэнне кахання, трэцяя — стварэнне сям’і.

Устаноўлена 6 каваных лавак рознай формы — і ўсе яны ручной працы, уладкаваны дэкаратыўны масток, альтанка, а таксама кампазіцыя «Дрэва жыцця» для таго, каб маладыя маглі вешаць памятныя замочкі. Асобнай увагі заслугоўваюць 3 лавы, выкананыя ў форме сэрца. У межах стварэння інтэлектуальнага дасугавага асяроддзя ўстаноўлена спецыялізаваная лаўка для буккросінгу.

У цэлым на тэрыторыі бульвара праведзена пасадка тысячы руж белага і ружовага колеру. Таксама расстаўленыя 12 кашпо ў форме шароў з пасадкай у іх аднагадовых кветкавых раслін.

Цэнтральны раён — зона адпачынку «Партал у свет балота»

Тут створана сцежка працягласцю 500 метраў, устаноўлены малыя архітэктурныя формы, у тым ліку альтанка «Хата на курыных ножках», драўляныя фігуры, лаўкі. Для інфармацыі і вывучэння балотных экасістэм размешчана 8 інфармацыйных стэндаў экалагічнай накіраванасці.

Яна ХМЯЛЬНІЦКАЯ

Фота аўтара