У законную сілу ўступіў прысуд, вынесены двум гараджанам, 24 і 46 гадоў, якіх абвінавачвалі ў наўмысным прычыненні цяжкага цялеснага пашкоджання інваліду, перадае агенцтва «Минск-Новости».
У той дзень абвінавачаныя рабілі ў кватэры рамонт і заадно выпівалі. Калі спіртное скончылася, яны адправіліся ў магазін. На пр. Ракасоўскага прыяцелі сустрэлі двух мужчын, якія вялі амаральны лад жыцця і часам начавалі ў пад’ездах. Паміж імі ўзнік канфлікт з-за шуму ў пад’ездзе, і старэйшы з абвінавачаных беспадстаўна ўдарыў аднаго з іх нагой па ягадзіцах.
Па дарозе назад у фігуранты зноў убачылі тых грамадзян, якія сядзелі на лаўцы прыпыначнага пункта. Адзін са зламыснікаў ударыў нагой па мыліцы, з дапамогай якой рухаўся мужчына, а другі стаў выказваць яму прэтэнзіі, што той нібыта прадаваў дзецям наркотыкі. Паміж імі здарылася слоўная сварка. Раптам фігуранты накінуліся на грамадзяніна — яны штурхалі яго, наносілі ўдары рукамі, нагамі і мыліцай па галаве і целе, білі патыліцай аб лаўку. Калі пацярпелы аказаўся на зямлі, зламыснікі сталі скакаць па ім.
Пасля збітага мужчыну даставілі ў бальніцу. Вядома, што ён шмат гадоў з’яўляецца інвалідам II групы. Абвінавачаныя нанеслі яму не менш за 93 траўмавальныя ўдары рукамі, нагамі і мыліцай.
Падазраваных затрымалі, у дачыненні да іх распачалі крымінальную справу.
— Абвінавачаныя былі афіцыйна працаўладкаваныя, старэйшы з іх раней ужо меў праблемы з законам. У абодвух на ўтрыманні ёсць малалетнія дзеці, — пракаментавала старшы пракурор аддзела па наглядзе за адпаведнасцю закону судовых рашэнняў па крымінальных справах пракуратуры г. Мінска Вольга Дзіндзілевіч. — Суд прызнаў іх вінаватымі ў наўмысным прычыненні цяжкага цялеснага пашкоджання, гэта значыць пашкоджання, небяспечнага для жыцця, здзейсненага ў дачыненні да асобы, якая заведама знаходзіцца ў бездапаможным стане, з хуліганскіх памкненняў, групай асоб (пп. 1,7,9 ч. 2 арт. 147 КК). Старэйшаму з абвінавачаных прызначана пакаранне ў выглядзе пазбаўлення волі на тэрмін 7 гадоў, яго змоўшчыку — на 5 гадоў 6 месяцаў, якое яны будуць адбываць у папраўчай калоніі ва ўмовах узмоцненага рэжыму. На падставе Закона Аб амністыі суд вызваліў кожнага з абвінавачаных ад прызначанага пакарання ў выглядзе пазбаўлення волі часткова на тэрмін 1 год.
