Абвінавачаны некалькі месяцаў жыў з дзяўчынай. Пара часта сварылася і вырашыла разысціся. У той вечар фігурант ударам нагі адчыніў дзверы ў пакой і стаў выправаджваць сяброўку са сваёй кватэры. Тая была ў слухаўках, якія ён з яе сарваў. Далей зламыснік схапіў дзяўчыну за кашулю, выцягнуў у калідор, дзе кінуў на падлогу і нанёс не менш за шэсць удараў рукамі і нагамі па целе. Перапалоханая пацярпелая схапіла шкляную бутэльку і з мэтай самаабароны разбіла яе, зрабіўшы «ружачку».

Аднак гэта не спыніла дэбашыра — перамяшчаючыся па кватэры за сваёй ахвярай, ён хапаў яе за валасы, душыў. У нейкі момант дзяўчына забегла на балкон і ўзлезла на парапет. Яна думала, што зламыснік спалохаецца і перастане яе збіваць. З-за боязі вышыні пацярпелая павярнулася тварам да акна і, страціўшы раўнавагу, упала ўніз з другога паверха.

Пасля яе забрала хуткая — брыгаду медыкаў выклікаў прахожы. Супрацоўнікі міліцыі, якія прыехалі, затрымалі дэбашыра, у дачыненні да яго распачалі крымінальную справу. На судовым пасяджэнні віну ў інкрымінаваным злачынстве ён не прызнаў.

— Абвінавачаны працаўладкаваны мантажнікам у прыватнай кампаніі, раней да крымінальнай адказнасці не прыцягваўся, — пракаменціравала старшы памочнік пракурора Фрунзенскага раёна Аксана Саковіч, якая выступала па гэтай крымінальнай справе дзяржаўным абвінаваўцам. — Суд прызнаў яго вінаватым у пагрозе забойствам, калі меліся падставы баяцца яе ажыццяўлення, і на падставе арт. 186 КК прызначыў пакаранне ў выглядзе абмежавання волі без накіравання ў папраўчую ўстанову адкрытага тыпу на тэрмін 1 год 6 месяцаў. Акрамя таго, абвінавачаны павінен выплаціць пацярпелай 2 500 рублёў у лік матэрыяльнага кампенсавання прычыненай маральнай шкоды.

Прысуд не ўступіў у сілу, можа быць абскарджаны і апратэставаны ва ўстаноўленым законам парадку.